پروان کې یوه باوري سرچینه وايي، طالبانو د دې ولایت بګرام ولسوالۍ کې د دریو ښځو په ګډون پنځه تنه د خلکو په وړاندې په دورو وهلي دي.
رخشانه: دا کسان نن (پنشنبې د غبرګولي ۱۴ مه) له واده بهر جنسي اړیکې په تور په عام محضر کې په دورو وهل شوي دي.
د رخشانې رسنۍ د سرچینې په وینا، دا کسان له ۳۰ تر ۳۹ پورې دورې وهل شوي.
معلومه نه ده، چې دې کسانو ته څومره موده بند سزا اورول شوې.
طالبانو له شاوخوا څلوېښتو ورځو را په دې خوا په عام محضر کې د خلکو په دورو وهلو خبرونه نه خپروي. دې ډلې له دې وړاندې د افرادو د دورو وهلو په اوونۍ واره توګه خپرول.
په دې وروستي مورد کې دې ډلې د د روان لمریز کال د وري میاشتې له ۲۹ مې د غوايي تر ۲ مې پورې، په اوو ولایتونو کې د دریو ښځو په ګډون ۴۹ تنه په عام محضر کې په دورو وهلي دي.
سره له دې، چې د بشري حقونو بنسټونه د خلکو په وړاندې د افرادو په دورو وهل غندلي او هغه یې د انساني کرامت څخه سرغړوای بللی، خو طالبانو په تېرو نېږدې پنځو کلونو کې په ټول هېواد کې، د ښځو او ځوانانو په ګډون سلګونه تنه، د بېلا بېلو تورونو له امله د خلکو په وړاندې په دورو وهلي دي.
دې ډلې د نړیوالې ټولنې او د بشري حقونو د بنسټونو غوښتنې ته په نه پاملرنې لږ تر لږه ۱۴ تنه د زرګونو نندارچیانو په ځانګړې توګه د ماشومانو په وړاندې اعدام کړي دي.
