ننګرهار کې ځايي سرچینې وايي، د دې ولایت کوز کونړ ولسوالۍ کې یوه ښځه او سړی د «نامشروع اړیکې» په تور د ښځې د ورور له خوا وژل شوي دي.
رخشانه: ننګرهار کې دوه سیمه ییزه سرچینو رخشانې رسنۍ ته ویلي، دا پېښه د تېرې اوونۍ پنشنبې (د غبرګولي ۱۴مه) د کوزکونړ ولسوالۍ د خېوې «بازارک» سیمه کې رامنځ ته شوې ده.
د سرچینې په وینا، ښځه او مېړه دواړه متآهل وو او د نامشروع اړیکې په تور، د ښځې د ورور له خوا په مرمیو وژل شوی دی.
دا ښځه او سړی د ناموسي مسائلو په دلیل وژل شوي دي.
د دې دوه کسانو د عمر او هویت په اړه څه نه دي ویل شوي.
د سیمې یو تن اوسېدونکي د هویت پټ ساتلو سره رخشانې رسنۍ ته ویلي، د دې ښځې او سړي تر وژل کېدو وروسته، د هغوی کورنۍ د جګړې لپاره چمتو شوي وو، خو د ځايي مخورو په منځګړیتوب د جګړې له رامنځ ته کېدو مخنیوی وشو.
له بل لوري ننګرهار کې د طالبانو د امنیه قوماندانۍ ویاند سید طیب حماد د دې پېښې د پخلي تر څنګ وايي، په وژنه تورن کس نیول شوی او په دې اړه پلټنې روانې دي.
د طالبانو له بیا واکمنېدو وروسته، په هېواد کې ناموسي وژنې او جنايي پېښې بې مخینې زیاتې شوې دي.
هر کال د هېواد په یو شمېر سیمو کې، لسګونه ښځې او نجونې د هغه څه په دلیل چې «ناموسي مسائل» بلل کېږي، د کورنۍ د غړو او یا د خپلوانو له خوا وژل کېږي.
د رخشانې رسنۍ د شمېرو له مخې، په تېر یوه کال کې د هېواد په ۲۳ ولایتونو کې لږ تر لږه ۱۱۷ ښځې او نجونې د کورنیو قتلونو، د بېوزلۍ له امله د ځان وژنې او له جبري واده څخه د تېښتې قرباني شوې دي.
