د هرات جبرییل ښارګوټي کې د یو شمېر لاریونیانو تر ځپلو، ټپي کېدو او نیولو وروسته، د افغانستان لپاره د برېتانیا ځانګړي استازي د طالبانو د ځواب وینې غوښتنه کړې ده.
رخشانه: لیندسي نن ماښام (سه شنبې د غبرګولي ۱۹ مه) په خپله اېکس پاڼه د یوه پوسټ په خپرولو سره لیکلي، «د هرات د [جبرییل] ښارګوتي پر واټونو د زور کارولو له راپورونو سخت اندېښمن یم.»
هغه د «تاوتریخوالي د کمېدو، بیان آزادۍ ته د درناوي او د هر ډول غیرقانوني زیان» په اړه د [طالبانو] د ځواب ویلو غوښتنه کړې ده.
نن سهار د هرات په جبرییل ښارګوتي کې ځايي سرچینو رخشانې رنۍ ته ویلي و، چې د دې ښارګوټي لسګونه تنه اوسېدونکو، د طالبانو له لوري د بې حجابۍ په تور د ښځو د نیولو په غبرګون کې اعتراضي غونډه کړې وه.
د سرچینو په وینا، د دې اعتراضي غونډې د جوړېدو په جریان کې طالب ځواکونو د لاریونیانو د ځپلو او پاشلو لپاره، پر هغوی مخامخ ډزې وکړې او لږ تر لږه درې تنه یې ټپیان کړل.
په هغه ویډیوګانو کې په ټولنیزو شبکو خپرې شوې لیدل کېږي، چې طالب ځواکونه د لاریونیانو پر لور مخامخ ډزې کوي.
عیني شاهدانو ویلي، دا اعتراضي غونډه له څو ساعتونو وروسته او د طالبانو د ځانګړې قطعې د ځواکونو په رسېدو سره پای ته ورسېده. د عیني شاهدانو په وینا طالب ځواکونه اوس کوڅه په کوڅه د لاریونیانو د نیولو په لټه کې دي.
د هرات جبرییل ښارګوټي کې د لاریونیانو ځپلو په پراخه کچه د خلکو، بشري حقونو د بنسټونو، له هغې جملې د افغانستان د بشري حقونو لپاره د ملګرو ملتونو د ځانګړي راپور ورکوونکي ریچارد بنټ غبرګونونه راپارولي دي.
بنټ نن ماسپښین د دې پېښې په غبرګون کې لیکلي «هرات کې د سوله ییزه لاریونونو په وړاندې له حده زیاتې زور کارونې څخه په ژوره توګه اندېښمن یم.»
هغه پر دوام لیکلي: «اوس د دې وخت رارسېدلي، چې تاوتریخوالی کم شي، د خلکو په ځانګړې توګه د ښځو او نجونو د بیان آزادۍ ته درناوی وشي.»
بنټ د [هرات د جبرییل ښارګوټي لاریون کوونکو] ته د زیان رسېدو د مخنیوي غوښتنه کړې وايي، د تاوتریخوالی عاملین باید وپېژندل شي او طالبان باید ځواب و وايي.
