پکتیکا کې د طالبانو امنیه قومانداني وايي، د دې ولایت برمل ولسوالۍ کې د «توپ» د یوې پخوانۍ مرمۍ د چاودنې له امله، د پنځو ماشومانو په ګډون اوو تنو ژوند له لاسه ورکړی او څلور نور ماشومان ټپیان شوي دي.
رخشانه: پکتیکا کې د طالبانو امنیه قوماندانۍ په یوه خبرپاڼه کې ویلي، دا پېښه پرون دوشنبې د (غبرګولي ۱۸ مه) مازیګر ۶:۳۰ بجې د برمل ولسوالۍ د «ډنګر» په سیمه کې رامنځ ته شوې ده.
خبرپاڼه کې راغلي، د «توپ» دغه پخوانۍ مرمۍ هغه مهال چاودلې، چې یوه سړي هڅه کوله، هغه ټوټې ټوټې کړي او له وسپنې یې ګټه واخلي.
د توپ مرمۍ د ټکولو له امله چاودلې، چې په ترڅ کې یې دوه لوی سړي او پنځه ماشومان وژل شوي او څلور نور ماشومان ټپیان شوي دي.
پکتیکا کې د طالبانو امنیه قوماندانۍ د دې پېښې د قربانیانو د عمر او هویت په اړه څه نه دي ویلي.
د دې پېښې ټپیان د درملنې په موخه روغتون ته لېږدول شوي، خو د روغتیايي وضعیت په اړه یې څه نه دي ویل شوي.
د جګړې له مهاله پاتې شوني ناچاودي توکي او ماینونه، هر کال په هېواد کې له لسګونو هېوادوالو په ځانګړې توګه له ماشومانو ژوند اخلي.
د یوناما د راپور له مخې، افغانستان کې د ماینونو او ناچاودو توکو ۸۰ سلنه قربانیان ماشومان دي.
د یوناما په وینا، افغانستان د چاودېدونکو توکو د مرګ ژوبلې له پلوه، په نړۍ کې درېیم ځای لري
