د هرات جبریل ښارګوټي کې ځايي سرچینې وايي، د طالبانو له لوري د ښځو د نیولو په غبرګون کې، په اعتراضي غونډه، د طالب ځواکونو په مخامخ ډزو کې درې تنه معترضان ټپیان شول.
رخشانه: دا اعتراضي غونډه نن سهار (سه شنبې د غبرګولي ۱۹ مه) د هرات د جبریل ښارګوټي د لسګونو اوسېدونکو په شتون کې جوړه شوه.
لږ تر لږه درې تنه عیني شاهدانو د دې اعتراضي غونډې د ځپلو په اړه رخشانې رسنۍ ته و ویل، چې د طالبانو په مخامخ ډوزو کې درې تنه ټپیان شوي او څو تنه نور نیول شوي دي.
د عیني شاهدانو په وینا، طالب ځواکونو د معترضینو د ځپلو او دې اعتراضي غونډې د ځپلو لپاره، په معترضینو مخامخ ډزې کوي.
سرچینو زیاته کړې، د طالبانو له لوري د معترضینو ځپل د زیاتېدو په حال کې دي او له ښاره د جبریل ښارګوتي په لور د طالبانو څو رنجرې چې د ځانګړې قطعې ځواکونه لېږدوي د حرکت په حال کې دي.
په هغه ویډیوګانو کې چې د هرات جبریل ښارګوټي کې د اعتراضي غونډې څخه په ټولنیزو شبکو خپرې شوې هم لیدل کېږي، چې طالب ځواکونه د لاریون کوونکو په لور مخامخ ډزې کوي.
همدارنګه په دې ویډیوګانو کې لیدل کېږی، چې معترضین له طالب ځواکونو سره لاس او ګرېوان دي او دا ځواکونه معترضین په سوټیو، لغتو او ټوپک وهلي ټکوي. د ناتار ډزو غږونه هم اورېدل کېږي.
د هرات د جبریل ښارګوټي اوسېدونکو تېره شپه په ټولینزو شبکو د یوې اعلامیې په خپرولو سره، د طالبانو له لوري د ښځو د نیونې په غبرګون کې د اعتراضي غونډې تر سره کولو خبر ورکړی وو.
هرات کې د طالبانو له لوري د حجاب نه رعایت کولو په تور د ښځو او ځوانو نجونو نیونه، د روانې اوونۍ د شنبې ورځې راهیسې پیل شوې ده، په دې موده کې لسګونه ښځې او نجونې د طالبانو له خوا نیول شوې او نامعلوم ځای ته لېږدول شوې دي.
هرات کې د ښځو نیونې د بشري حقونو د نړیوالو بنسټونو، له هغې جملې، د یوناما، بښنې نړیوال سازمان او فعالانو غبرګونونه راپارولي دي.
