کابل کې د طالبانو د امنیه قوماندانۍ ویاند خالد ځدراڼ تایید کړه، چې د کابل ښار شپږمه ناحیه کې، یو لنډکروز ډول موټر درې نجونې وهلې او هغوی یې ټپیانې کړې دي.
رخشانه: ځدراڼ نن ماښام (پنشنبې د غبرګولي ۲۱ مه) په خپله اېکس پاڼه د یوه پوسټ په خپرولو سره لیکلي، د دې پېښې عاملین پېژندل شوي دي.
کابل کې د طالبانو د امنیه قومانداني ویاندو د دې موټر چلوونکي هویت نه دی مشخص کړی، خو وايي، د دې کس د نیول لپاره هڅې پیل شوې دي.
د ځدراڼ په وینا، د پېښې ټپیان د درملنې په موخه روغتون ته لېږدول شوې او روغتیايي وضعیت یې د ډاډ وړ دی.
هغه نه ده مشخصه کړه، چې دا پېښې څه وخت او د کابل ښار د شپږمې حوزې کومه سیمه کې رامنځ ته شوې ده.
نن په ټولنیزو شبکو یوه ویډیو په پراخه کچه خپره شوې، چې په کې لیدل کېږي، یو لنډکروز ډول موټر څو نجونې وهي.
په دې ویډیو کې لیدل کېږي، چې څو تنه نجونې په سړک روانې دي. نا څاپه یو سپین رنګه موټر په سرعت سره نجونې وهي او له سیمې تېښته کوي.
د ټولنیزو شبکو کاروونکو لیکلي وو، دا موټر د طالبانو په یوه غړي پورې اړوند دی او هغه نجونې چې دې موټر وهلې، د پنجشېر ولایت اوسېدونکې دي.
