ایران کې د افغان کډوالو تر منځ سرچینې وايي، مشهد ښار کې یو شمېر محصلو افغان نجونو، چې د طالبانو له لوري د ښځو نیونې غبرګون کې یې غونډه کړې وه، د ایران د بسیج ځواکونو له خوا ونیول شوې.
رخشانه: دا زده کړیالې نجونې پرون جمعه د (غبرګولي ۲۲ مه) له ماسپښين وروسته، د مشهد ښار «ګلشهر» سیمه کې راغوڼډې او اعتراض یې کړی وو.
د ایران مشهد کې د افغان کډوالو تر منځ دوه سرچینو د عیني شاهدانو له قوله ویلي، د ایران بسیج ځواکونو، دا محصلینې و وهلې او ویې نیولې.
د ایران د بسیج ځواکونو له خوا د نیول شویو افغان زده کړیالو نجونو کره شمېر نه دی معلوم.
سرچینو ویلي، بسیج ځواکونو د دې زده کړیالو افغان نجونو تر نیولو وروسته، د اعتراضي غونډو جوړېدو د مخنیوي لپاره سیمه نه ده پرېښې.
د سرچینو په وینا، دغو ځواکونو د «فلکې» شاوخوا حضور درلود او څو عرادې «لوی بس ته ورته موټرونه» یې هم له ځان سره راوستي وو.
تر اوسه معلومه نه ده، چې دا زدکړیالې افغان نجونې د ایران د بسیج ځواکونو له بنده خوشې شوې که نه.
دا په داسې حال کې ده، چې دوه ورځې وړاندې هم د ایران تهران کې د افغان سفارت مخې ته یو شمېر ښځو، د طالبانو له خوا په هرات کې د ښځو او نجونو د نیولو په غبرګون کې اعتراضي لاریون کړی وو.
د ایران د وګړو عمومي ادارې، له دې لاریون وروسته اعلان وکړ، چې افغان وګړي حق نه لري، د دې ادارې له همغږۍ او اجازې پرته، په دې هېواد کې لاریونونه وکړي.
