د بې پولې ډاکترانو سازمان (MSF) اعلان کړی، چې د طالبانو امربالمعروف ځواکونو، تېره اوونۍ هرات ښار کې دې سازمان پورې تړلې یوه ښځینه ډاکتره، د حجاب نه رعایت کولو په تور نیولې ده.
رخشانه: دا ښځینه ډاکتره د تېرې اوونۍ د شنبې په ورځ (د غبرګولي ۱۶ مه) هرات حوزوي روغتون ته پر لار، د مېړه په شتون کې د طالبانو د امربالمعروف ځواکونو له خوا نیول شوې ده.
د بې پولو ډاکترانو سازمان ویلي، دا ښځینه ډاکتره، چې د هرات حوزوي روغتون کې د دې سازمان تر ملاتړ لاندې ماشومانو برخه کې یې کار کاوه، له دوه ورځې بند او لیکل شوي ګواښ وروسته د طالبانو له بنده خوشې شوې ده.
دې سازمان هرات کې د طالبانو د امربالمعروف له خوا د دې ښځینه کارکوونکې په دوه ورځني بند غوسه ښودلې وايي، دا محدودیتونه به «د روغتیايي خدماتو په وړاندې کولو مستقمې اغېزې» ولري.
د بې پولې ډاکترانو سازمان وايي، په دې دلیل چې «د زېږون پاملرنې په پروژو متمرکزې» دي، د دې بنسټ له نیمايي زیات کاري ځواک ښخې جوړوي او د شځو لپاره د درملنې په ځانګړو ځایونو کې د خدماتو وړاندې کولو لپاره د ښځو شتون اړین دی.
دې سازمان زیاته کړې، د ښځو پر کار او تګ راتګ او په ځانګړې توګه د روغتیا په برخه کې په ملي او نړیوالو بنسټونو کې، د ښځو پر کار د محدودیتونو لګول، هېوادوالو ته د روغتیايي خدماتو په وړاندې کولو منفي اغېز کوي.
د دې سازمان په وینا، «دا محدودیتونه په نابرابره توګه ښځې او ماشومان اغېزمنوي، ځکه چې دوی ډېری وخت د خوندي او کلتوري پلوره مناسبو روغتیايي خدماتو چمتو کولو لپاره، په ښځینه روغتیايي کارکوونکو تړلې دي.»
هرات کې د طالبانو ځايي ادارې د تېرې اوونۍ د شنبې له ورځې، په دې ولایت کې د ښځو او نجونو په حجاب لا جدي محدودیتونه لګولي دي. د دې محدودیتونو د لګولو په ترڅ کې، لسکونه ښځې او ځوانې نجونې د حجاب نه رعایت کولو په تور د دې ډلې له خوا نیول شوې دي.
د طالبانو له خوا د ښځو او نجونو نیونې، پراخ غبرګونونه راپارولي، له هغې جملې د تېرې اوونۍ د سه شنبې په ورځ، د هرات د جبرئیل ښارګوټو اوسېدونکو په لاریون لاس پورې کړ، چې د طالبانو له خوا وځپل شو.
