غزني او فراه ولایتونو کې د دوه جلا ترافیکي پېښو په ترڅ کې پنځه تنه مړه او د ۱۱ ښځو په ګډون ۴۰ تنه نور ټپیان شوي دي.
رخشانه: لومړنۍ پېښه د غزني ښار اړوند سیمه او دویمه هغه د فراه ولایت فراه رود ولسوالۍ کې رامنځ ته شوې ده.
غزني کې د طالبانو د امنیه قوماندانۍ ویاند خالد سرحدي ویلي، دغه ترافیکي پېښه د شنبې شپه (د غبرګولي ۲۳ مه) ۱۰ بجې د غزني ښار د «روضې کوتل» په سیمه کې رامنځ ته شوې ده.
نوموړي زیاته کړې، په دې پېښه کې دوه تنه وژل شوي او د ۱۱ ښځو په ګډون ۲۹ تنه نور ټپیان شوي دي.
سرحدي وايي، دغه ترافیکي پېښه د یوه مسافر وړونکي ۵۸۰ موټر او یوه بار وړونکي ټېلر موټر د ټکر له امله رامنځ ته شوې ده.
د پېښې ټپیان د غزني ښار مرکزي روغتون ته د درملنې په موخه وړل شوي دي. د دې پېښې د ټپیانو د هویت، جنسیت او روغتیايي وضعیت په اړه څه نه دي ویل شوي.
د پېښې د رامنځ ته کېدو لامل، د موټر چلوونکو بې احتیاطي ښودلې شوده.
بل خوا فراه کې د طالبانو امنیه قوماندانۍ په یوه خبرپاڼه کې لیکلي، د دې ولایت فراه رود ولسوالۍ کې د یوې ترافیکي پېښې له امله درې تنو ژوند له لاسه ورکړی او ۱۱ نور ټپیان شوي دي.
خبرپاڼه کې راوړل شوي، دا ترافیکي پېښه نن (يکشنبې د غبرګولي ۲۴ مه) له ماسپښين مخکې، د فراه ردو ولسوالۍ اړوند سیمه کې رامنځ ته شوې ده.
فراه کې د طالبانو امنیه قومانداني وايي، دغه پېښه د یوه فیلډر او یوه هایلکس موټر د ټکر له امله رامنځ ته شوې، چې په کې درې تنه مړه او ۱۱ ټپیان دي.
د دې پېښې ټپیان د درملنې په موخه روغتیايي مرکز ته لېږدول شوي، خو روغتیايي وضعیت یې نازک ښودل شوی دی.
فراه کې د طالبانو د امنیه قوماندانۍ په وینا، دا پېښه هم د موټر چلوونکو د بې احتیاطۍ له امله رامنځ ته شوې ده.
