د ملګرو ملتونو د بشري مرستو د همغږۍ دفتر (اوچا) اعلان کړی، چې افغانستان کې کابو ۳.۷ میلیونه ماشومان په سخته خوارځواکۍ اخته دي.
رخشانه: اوچا نن (دوشنبې د غبرګولي ۲۵ مه) په یوه راپور کې ویلي، د مخنیوي وړ او ژوند ژغورونکو تغذیوي مداخلو پرته، د تغذیې وضعیت احتمال لري، د ۲۰۲۶ کال په جریان کې لا خراب شي.
دې بنسټ ویلي، ۲۰۲۶ کال کې په افغانستان کې د تغذیې وضعیت په ګړندۍ توګه د خرابېدو په حال کې دی او د ۲۰۲۵ کال په پرتله، له ټولو ۳۴ ولایتونو څخه په ۲۶ ولایتونو کې سختې خوارځواکۍ زیاتوالی کړی دی.
اوچا دفتر زیاته کړې، د خوارځواکۍ د لوړو فصل (د جولای نه تر سپټمبر پورې» د پیل څخه د مخه د سختې خوارځواکۍ خرابوالی رامنځ ته شوی، چې د یوه ژر او سخت بحران د رامنځ ته کېدو ښودونه کوي.
د ملګرو ملتونو د بشري مرستو د همغږۍ دفتر وايي، د دې وضعیت په عواملو کې د مور د شیدو ناسم دودونه، خواړه او د ماشومانو ناسمه پاملرنه، د خوړو د خوندیتوب زیاتوالی، د ناروغیو زیاتوالی، د اوبو له خدمتونو محرومیت، روغتیا، پاکۍ او تغذي خدمتونو ته د خلکو د لاسرسي کموالی شامل دي.
د اوچا په وینا، نېږدې ۴۰ سلنه ماشومان د شپږو میاشتو څخه کم عمر د شدیدې خوارځواکۍ، له امله په روغتونونو کې بستر دي، چې دا په کم عمر کې د خطر زیاتوالي او په روغتیايي خدماتو باندې د فشار زیاتوالی په ګوته کوي.
دې بنسټ زیاته کړې، د دوو کلونو څخه کم عمر لرونکي ماشومان په غیر متناسب ډول اغېزمن شوي، په داسې توګه چې ۸۳ سلنه د شدیدې خوارځواکۍ قضیې او ۷۷ سلنه د منځنۍ خوارځواکۍ قضیې جوړوي. همدارنګه آټکل کېږي، چې ۱۹ سلنه قضیې د لوړ خطر ګروپ کې دي.
اوچا ویلي دي، په ۲۰۲۶ کال کې به شاوخوا ۳.۷ میلیونه ماشومان له سختې خوارځواکۍ سره مخ شي، چې ۹۴۲ زره مورده به یې سخته خوارځواکي، ۷۰۷ زره او ۴۰۴ مورده له ګواښه ډکه د منځنۍ کچې خوارځواکي او دوه میلیونه مورده د لومړي پړاو د منځنۍ کچې خوارځواکي کېږي. پر دې سربېره، اټکل کېږي، چې ۱.۲ میلیونه امیدواره او شیدې ورکوونکې ښځې هم تر اغېز لاندې راشي.
د ملګرو ملتونو د بشري مرستو د همغږۍ دفتر وايي، د انساني تلفاتو او نه جبرانېدو پایلو د مخنیوي لپاره د بېړني تمویل د زیاتوالي او تغذیې د اړینو پروګرامونو تر سره کول اړین دي.
