د ملګرو ملتونو امنیت شورا، افغانستان کې د ملګرو ملتونو د سیاسي استازولۍ دفتر (یوناما) ماموریت د یوه بل کال لپاره تمدید کړی دی.
رخشانه: د یوناما ماموریت د ملګرو ملتونو د امنیت شورا په هغه غونډه کې، چې نن (دوشنبې د غبرګولي ۲۵ مه) جوړه شوې وه، د یوه بل کار لپاره تمدید شوی دی.
په افغانستان کې د یوناما ماموریت د ملګرو ملتونو امنیت شورا د غړو په ۱۵ مثبتو او له هېڅ منفي رایې پرته، د یوه بل کال لپاره تمدید شوی دی.
چین چې د افغانستان په اړه د ملګرو ملتونو د پرېکړه لیکونو مسودې مسولیت لري، له دې وړاندې په افغانستان کې د یوناما د یو کلن ماموریت د تمدید غوښتنه کړې وه، خو امریکا له دې وړاندیز سره مخالفت وکړ.
امریکا د ملګرو ملتونو امنیت شورا ته په افغانستان کې د یوناما د لنډ مهاله ماموریت د غځولو وړاندیز کړی وو، چې د «دې ماموریت د موثریت او د لګښتونو د بیا کتنې امکان برابري شي.»
د ملګرو ملتونو امنیت شورا د تېر لمریز کال د کب میاشتې په ۲۵ مه نېټه، افغانستان کې د یوناما ماموریت د یوې درې میاشتنې دورې لپاره تمدید کړی وو.
