د بامیان ولایت پنجاب ولسوالۍ کې ځايي سرچینې وايي، په دې ولسوالۍ کې د یوه کلي پر اوسېدونکو د وسله والو کوچیانو په برید کې درې نارینه ټپیان شوي او پر ښځو او ماشومانو هم ډزې شوې دی.
رخشانه: پنجاب ولسوالۍ کې دوه ځايي سرچینو رخشانې رسنۍ ته ویلي، دا پېښه نن (سه شنبې د غبرګولي ۲۶ مه) سهار ۱۰ بجې د بامیان د پنجاب ولسوالۍ د « توبک پُشته غُرغُری» په کلي کې رامنځ ته شوې ده.
د سرچینو په وینا، وسله والو کوچیانو شاوخوا پنځه سوه سره څاروي د دې کلي کروندو کې خوشي کړي وو او کله چې د سیمې اوسېدونکو د خپلو کروندو د تخریب مخینوي لپاره کوچیانو ته ورځي، د هغوی تر برید لاندې راځي.
سرچینو زیاته کړې، وسله والو کوچیانو د دې کلي د خلکو پاشلو لپاره، پر هغوی ډزې کړې او د « توبک پُشته غُرغُری» کلي درې تنه اوسېدونکي، حاجي محمد حسین، جعفر او علي داد یې د «مرګ تر بریده» وهلي دي.
له ټپیانو د یوه تن روغتیايي حالت نازک ښودل شوی او دوه نور ښه دي.
د سرچینو د خبرو له مخې، وسله والو کوچیانو د کلي د خلکو تر پاشلو وروسته، د هغوی د کورونو پر لور ورغلي او د دې کلي پر ښځو او ماشومانو یې هم ډزې کړې او هغوی یې له کورونو شړلي دی.
په هغه انځورونو کې چې له دې پېښې رخشانې رسنۍ ته رالېږل شوي، د څو نارینه وو له هغې جملې د یوه سپین ږیري په بدن د توروالي او تپونو نښې ښکاره تر سترګو کېږي.
سرچینو زیاته کړې، د سیمې اوسېدونکو پنجاب ولسوالۍ کې د طالبانو ځايي ادارې ته شکایت وکړ، خو دې ډلې د خلکو غوښتنې ته پام ونه کړ او موضوع یې تعقیب نه کړه.
هر کال د پسرلي موسم په رارسېدو سره، وسله وال کوچیان له زرګونه سره څارویو سره، د هېواد مرکزي سیمو په ځانګړې توګه هزاره مېشتو سیمو باندې یرغل کوي.
وسله وال کوچیان په هزاره مېشتو سیمو په یرغل سره، د خلکو کروندې له منځه وړي، ځايي اوسېدونکي ځوروي او د خلکو د مقاومت مخ کېدو په صورت کې، هغوی وهلي ټکوي او وژني یې.
د وسله والو کوچیانو او هزاره مېشتو سیمو د خلکو تر منځ موضوع یوه نا حل شوې موضوع پاتې ده. کوچیانو د طالبانو له بیا واکمنېدو وروسته، له دې ډلې سره د اړیکو لرلو څخه په ګټنې، د هزاره مېشتو سیمو د اوسېدونکو ځورولو ته زور ورکړی دی.
