د ملګرو ملتونو کارپوهانو د طالبانو له خوا د زوجینو جلاوالي قانون د توشېح په غبرګون کې ویلي، دا قانون ښځې او نجونې د ناوړه ګټې اخیستنې او استحصال سره مخ کوي.
رخشانه: د ملګرو ملتونو کارپوهانو نن (پنشنبې د غبرګولي ۲۸ مه) په یوه بیانیه کې د زوجینو جلاوالي په اړه د طالبانو قانون، د ښځو او نجونو حقونه تر پخوا ډېر کمزوري کوي.
د دوی په بیانیه کې د دې قانون په اړه خبرداری ورکړل شوی وايي، دا قانون هم د ماشومتوب واده ته مشروعیت ورکوي او هم د دې خنډ ګرځي، چې ښځې او نجونو وکولی شي، د تاوتریخوالي ډکو او ځوروونکو اړیکو څخه ووځي.
اعلامیه کې زیاته شوې، دا قانون ښځې او نجونې د ناوړه ګټې اخیستنې او استحصال په وړاندې زیانمنوي او دا فرمان همدارنګه کولی شي، افغانستان کې پر شیعه او نورو ټولو لږکیو هم منفي اغېز وکړي.
د ملګرو ملتونو د کارپوهانو په وینا، «دا فرمان تر هر څه ډېر د ماشومتوب واده ته اعتبار ورکوي، د ودونو په ترتیب کولو کې د سرپرستانو له خوا د ناوړه ګټې اخیستنې احتمال زیاتوي او د نجونو لپاره دا کابو ناممکن کوي، چې د کورني تاوتریخوالي په اړه راپور ورکړي یا اقدام وکړي.»
دوی زیاته کړې، د دې فرمان له مخې، کېدای شي نجونې د طلاق غوښتلو د مخه، کلونو کلونه له فزیکي، رواني، جنسي او اقتصادي ناوړه ګټې اخیستنې سره مخ شي.
دوی ویلي: «دا فرمان د هغو ښځو او نجونو لپاره چې د مېړونو یا د خسرګنۍ له خوا ځورول کېږي، دا خورا ستونزمنه او ناشوني کوي، چې د تاوتریخوالي راپور ورکړي او د جلا کېدو غوښتنه وکړي.
د ملګرو ملتونو د کارپوهانو په اند، د طالبانو له خوا د زوجینو جلاوالي قانون کې ځینې مفاهیم لکه «نه مطابقت، د مېړه ورکېدل، لجاجت او مذهبي دلایل» نه دي تعریف شوي.
هغوی زیاته کړې، افغانستان لا هم اړوندو نړیوالو تړونونو ته ژمن دی، چې په کې د ښځو په وړاندې د هر ډول تبعیض د لمنځه وړلو کنوانسیون(CEDAW) د ماشومانو د حقونو کنوانسیون، د ربړونې او نورو ظالمانه، غیرانساني او سپکاوي د مخنیوي کنوانسیون او له ښځو او ماشومانو سره د چلند په برخه کې د سزا کنوانسیون شامل دي.
د ملګرو ملتونو کارپوهانو د افغان ښځو او نجونو په وړاندې د طالبانو پراخو محدودیتونو ته په اشارې وايي، په داسې شرایطو کې له هغو حقونو کار اخیستل کابو ناشونی کار دی، چې د دې فرمان له مخې ښکار د هغوی لپاره په محکمه کې د حا
په افغانستان کې د ښځو او نجونو پر وړاندې د طالبانو پراخو محدودیتونو ته په اشارې سره، د ملګرو ملتونو کارپوهانو ویلي، په داسې شرایطو کې له هغو حقونو چې دې فرمان په ښکاره د هغوی لپاره په پام کې نیولي، له هغې جملې په محکمه کې حاضرېدل، ناشونی کار دی.
دې کارپوهانو د طالبانو له خوا د دې قانون پلي کېدو د پایلو په اړه خبرداری ورکړی ویلي یې دي: «د کړنلارو ملاتړو خدماتو او د ښځو د حقونو د مدافع بنسټونو نشتوالي دا وضعیت لا خراب کړی دی.»
د ملګرو ملتونو کارپوهانو ویلي، د نړیوالو قوانینو پر بنسټ طالبان اړ دي، چې د تاوتریخوالي په وړاندې له ښځو او ماشومانو ساتنه وکړي او له انساني کرامت، برابرۍ او امنیت لپاره د هغوی حقوق تضمین کړي.
دوی «د دې فرمان د تبعیض لرونکو موادو د لغوه کېدو» غوښتنه کړې وايي، دوی د طالبانو له خوا د زوجینو جلاوالي قانون په اړه د یوه تفصیلي تحلیل د چمتو کولو په هڅه کې دي.
