افغانستان کې د کډوالو نړیوال سازمان (IOM) د دفتر مشرې میا پارک خبرداری ورکړی، چې د افغان ښځو او نجونو لویه اندېښنه دا ده، چې نړیواله ټولنه به یې هېرې کړي.
رخشانه: افغانستان کې د کډوالو نړیوال سازمان (IOM) د دفتر مشرې له سکای نیوز سره په مرکه کې ویلي دي: «هر ځل چې له افغان ښځو او نجونو سره ګورم، لویه اندېښنه یې بل څه نه، بلکې دا ده، چې هېرې به شي.»
د مېرمن پارک په وینا، نورو بحرانونو لکه جګړو، له افغانستان نه د نړیوالو پام اړولی دی.
هغې د دې پوښتنې په ځواب کې، چې آیا افغانستان د نړیوالې ټولنې له اجنډا ایستل شوی دی، و ویل: «دا رښتیا زموږ اندېښنه ده او فکر کوو، د افغان ښځو او نجونو لپاره هم لویه وېره همدا ده.»
مېرمن پارک همدارنګه زیاته کړې، له ایران او پاکستان ته د افغان کډوالو په زور ایستلو، په ځانګړې توګه د د دغو کورنیو د لوڼو لپاره وضعیت لا پېچلی کړی دی. «هغه نړۍ چې دوی له ستنېدو مخکې پېژندله، له هغې نړۍ سره، چې اوس په افغانستان کې ورسره مخ دي، په بشپړه توګه توپیر لري.»
د کډوالو نړیوال سازمان وايي، د ۲۰۲۳ د سپټمبر میاشتې د سږ کال تر می پورې، یعنې په څه کم درې کلونو کې له شپږ میلونه زیات افغان کډوال له پاکستان او ایران څخه خپل هېواد ته ستانه شوي دي.
طالبانو افغانستان کې له بیا واکمنېدو وروسته، د ښځو او نجونو په وړاندې پراخ محدودیتونه لګولي دي، له هغې جملې له زده کړو راګرځول.
نن یو زر اوه سوه څلوردېرشمه ورځ ده، چې طالبانو له شپږم ټولګي بره نجونې ښوونځي ته له تګه بندې کړې دي.
افغانستان کې د کډوالو نړیوال سازمان(IOM) د دفتر مشرې ټینګار کړی، چې افغان ښځې او نجونې، د نړیوالې ټولنې دوامداره ملاتړ ته اړتیا لري. «ډېره مهمه ده، چې هغوی هېرې نه کړو، تر څنګ یې و اوسو او هر کله چې وتوانېږو، له هغوی ملاتړ وکړو.»
خو طالبان وايي، دې ډلې د اسلامي شریعت په چوکاټ کې د ښځو ټول حقونه رعایت کړي دي.
