د طالبانو د حج او اوقافو وزارت د ښځو د حجاب ځانګړنې مشخصې کړې او د ټول هېواد له خطیبانو او جوماتونو امامانو یې غوښتي، چې د جمعې نمانځه په خطبو کې د حجاب د ځانګړنې بیان کړي.
رخشانه: په دې تګلاره چې تېره ورځ پنشنبې د (غبرګولي ۲۸ مه) په فارسي او پښتو ژبو صادره شوې، راغلي چې «شرعي حجاب باید په لازمي توګه رعایت شي.»
د طالبانو د حج او اوقاف وزارت په تګلاره کې راغلي، کله چې ښځې له کوره وځي، باید بې سینګاره جامې لکه چادري او برقع ولري.
طالبانو ویلي، حجاب باید د ښځې ټول بدن پټ کړي، بې سینګاره او پام اړونکی نه وي، ډبل وي او نری نه وي، په داسې ډول چې اندامونه یې له شا ښکاره نه شي.
د دې تګلارې له مخې، حجاب تنګ، چسپ، عطر او ښه بوی لرونکی، نارینه وو ته ورته او د غیر مسلمانانو په شان نه وي.
همدارنګه طالبانو ویلي، بې حجابي د «یهودو دسیسه» ده او هغه ښځې چې حجاب نه رعایت کوي، «منافقې» دي.
طالبانو په دې تګلاره کې خبرداری کې د نارینه وو او ښځینه وو تر منځ اختلاط کېدای شي په ټولنه کې د فساد د خورېدو لامل شي.
طالبانو په تېرو نېږدي پنځو کلونو کې، سلګونه ښځې او نجونې د حجاب نه رعایت کولو په تور نیولې او زنداني کړې دي. په وروستي ځل، دې ډلې هرات ښار کې لګونه ښځې او نجونې ونیولې.
دې ډلې واک ته له بیا رسېدو وروسته، له ۴۷۰ زیات فرمانونه، تګلارې او حکمونه صادر کړي، چې ۷۹ مورده یې په ځانګړې توګه ښځې او نجونې په نښه کړې او هغوی یې له خپلو ټولو بنسټیزو حقونو او خپلواکیو محرومې کړې دي.
