د افغان کډوالو د ستنولو په اړه د خبرو اترو لپاره اروپا ته د طالبانو بلنې ته د غبرګونونو پر دوام، د بشري حقونو څار ډلې او ملالې یوسفزۍ دې اقدام ته غبرګون ښودلی دی.
رخشانه: د بشري حقونو څار ډلې نن (دوشنبې د چنګاښ اوله) د یوې بیانیې په خپرولو سره، له اروپايي ټولنې غوښتي، چې افغان کډوالو ایستل ودروي.
د بشري حقونو څار ډله کې افغان څېړونکې فرشته عباسي وايي، اروپايي ټولنه، له یوه لوري د طالبانو له خوا د بشري حقونو د سرغړونو غندنه او له بل لوري له دې ډلې سره د کډوالو د ایستلو برخه کې په همکارۍ سره خپل اعتبار کمزوری کوي.
د بشري حقونو دې څېړونکې ټینګار کړي، چې اروپايي ټولنه باید، افغانستان ته د کډوالو په سنتولو کې، له طالبانو سره، له هر ډول تعامل څخه ډډه وکړي.
نوموړې ویلي: «د طالبانو سره هر ډول تعامل باید په لومړي سر کې د بشري حقونو د ارزښتونو خوندیتوب او ځواب وینې تضمین باندې راټول شي، نه هغه هېواد ته د افرادو په ایستلو، چې په هغې کې له خطر سره مخ دي.»
په ورته وخت، د بشري حقونو فعالې او د نوبل جایزې ځوانې ګټونکې ملالې یوسفزۍ په خپله شخصي انسټاګرام پاڼه د یوې ویډیو په خپرولو سره، د اروپايي ټولنې له لوري د خبرو لپاره بروکسل ته د طالبانو پر بلنې ژوره خواشي ښودلې.
مېرمن یوسفزۍ د طالبانو تر واک لاندې افغان ښځو او نجونو وضعیت ته په اشارې ویلي: «دا همغه طالبان دي، چې نجونې یې د منځنۍ دورې له زده کړو محرومې او هغوی یې جبري ودونو ته اجار کړې دي. دا همغه طالبان دي، چې د جون میاشتې په لمړیو ورځو کې یې لسګونه هراتي ښځې د حجاب په تور نیولې دي.»
هغه پر دوام وايي: «دا همغه طالبان دي، چې د هغو ښځو په وړاندې چې خپل غږ پورته کوي او د دې ډلې له قوانینو سرغړونه کوي، نیسي یې، وهي ټکوي یې او ان په اعدام ځواب ورکوي.»
همدارنګه ملالې یوسفزۍ ویلي، طالبان د جنسیتي توپیر په پلي کولو سره، ښځې او نجونې له عمومي ژوند څخه لرې کړې دي.
نوموړې خبرداری ورکړی، چې اروپايي ټولنه نه باید هغه ډلې ته مشروعیت ورکړي، چې په نړۍ کې د «تر ټولو بد بشري حقونو د بحران» مسوول دي.
هغې ټینګار کړی، چې له طالبانو سره هر ډول نړیوال تعامل، باید د افغان ښځو او نجونو د حقونو پر محور پیل شي او پر همغه محور پای ومومي.
د اروپايي ټولنې بلنه، په پراخه کچه د افغان کډوالو له غبرګون سره مخ شوې ده. افغان کډوالو له تېرو دوه اونیو راهیسې د نړۍ په بېلا بېلو ښارونو کې، له طالبانو سره د اورپايي ټولنې پر خبرو اترو اعتراضي غونډې کړې دي.
