د برېتانیا شاه نن په کلارنس هاوس کې د افغانستان د کرکټ ښځینه ملي لوبډلې کوربه شو، هغه ښځې، چې د طالبانو له لوري له ټولو لوبو بندې، هېواد یې پرېښود او اوس په جلاوطنۍ کې د خپل لوبیز هویت د خونديتوب او لوبو د حق لپاره مبارزه کوي.
رخشانه: د برېتانیا سلطنتي ماڼۍ نن (د چنګاښ ۳ مه) په خپله اېکس پاڼه د یوه پیغام په خپرولو سره اعلان کړی، چې درېیم چارلز شاه، نن سهار په خپل استوګنځي کلارنس هاوس کې د افغانستان د کرکټ ښځینه ملي لوبډلې، چې د جمهوري نظام تر پاشل کېدو وروسته یې هېواد پریښي دی، خپل حضور ته ومنله.
په دې پیغام کې راغلي، د افغانستان د کرکټ ښځینه ملي لوبډله په ۲۰۱۰ کال کې د جمهوري دولت پر مهال افغانستان کې جوړه شوه، خو د طالبانو په واک ته رسېدو سره یې خپل رسمي مقام له لاسه ورکړ، طالبانو ښځې او نجونې، له لوبو، زده کړو، کار او په عمومي ځایونو کې له حضور څخه بندې کړې دي.
هغه محدودیتونه، چې د بشري حقونو سازمانونه یې «جنسیتي توپیر» بولي.
په دې لیدنه کې د برېتانیا شاه د یو شمېر لوبغاړو کیسې واورېدلې، د هغو ښځو چې د طالبانو له ځپلو او ګواښلو وروسته تېښتې ته اړ شوې او اوس په بېلا بېلو هېوادونو کې په جلاوطنۍ کې ژوند کوي. هغوی په جلاوطنۍ کې په غیررسمي توګه په ځايي کېمپونو کې لوبې کوي او همدارنګه د افغانستان د ښځو ملي ټیم د په رسمیت پېژندنې لپاره هڅه کوي.
دا لیدنه پر داسې مهال تر سره کېږي، چې افغان ښځې او نجونې له خپلو تر ټولو لومړنیو حقونو محرومې دي.
د افغانستان د کرکټ او فوټبال ښځینه ملي لوبډلې اوس د ښځو د مقاومت په سمبول بدلې شوې، چې ان په جلاوطنۍ کې هم د لوبو حق، د لیدل کېدو د حق او د ژوند کولو د حق لپاره مبارزه کوي.
د برېتانیا شاه په دې لیدنه کې د لوبو لپاره د دوی د هڅو ستاینه وکړه، چې په جلاوطنۍ کې یې د ژوند بیا رغونه او خپل مسلک ته دوام ورکړی دی.
د افغانستان د کډوالو ښځینه کرکټ ملي لوبډلې د دوشنبې په ورځ د (چنګاښ ۲ مه) په انګلستان کې خپله شل اوریزه سیالي پیل کړه. دغه سفر د انګلستان او ویلز کرکټ بورډ په بلنه او د دې لوبډلې د لوبغاړو د ملاتړ په هدف تر سره شو.
