د بې پولې ډاکترانو سازمان (MSF) اعلان کړی، چې د افغانستان په سویل کې، د دې سازمان په طبي مرکزونو کې په شدیده خوارځواکۍ او د هغې په اختلاطاتو اخته ماشومانو شمېر د اندېښنې وړ زیات شوی دی.
رخشانه: د بې پولې ډاکترانو سازمان نن (چهارشنبې د چنګاښ ۲۴ مه) په یوه بیانیه کې ویلي، د ۲۰۲۶ له جنورۍ تر اپرېل پورې د افغانستان په سویل کې، د دې سازمان لخوا د درملنې په مرکزونو کې د شیدیدې خوارځواکۍ اخته ماشومانو د داخلېدو شمېر، د تېرو دریو کلونو د همدې مودې په پرتله، په اوسط ډول ۳۰ سلنه زیات شوی دی.
دې سازمان ویلي، ډېری له دې ماشومانو له یوه کال نه کم عمر لري او خبرداری یې ورکړیو چې د نړیوالو مرستو کمېدل، د روغتیايي مرکزونو بندېدل، وچکالۍ او د خوړو نه خوندیتوب زیاتوالي، د زرګونو ماشومانو ژوند له خطر سره مخ کړی دی.
د افغانستان په سویل کې د بې پولې ډاکترانو سازمان همغږې کوونکې آنا لیلیا باندا ویلي دي، ډېری ماشومان هغه وخت د درملنې مرکزونو ته رسول کېږي، چې وضعیت یې وخیم شوی او د مخنیوي وړ اختلاطاتو سره لاس او ګرېوان وي.
دې سازمان ویلي، یوازې د ۲۰۲۶ کال په لومړیو څلورو میاشتو کې له یو زر او ۵۰۰ څخه زیات ماشومان، چې له سختې خوارځواکۍ او روغتیايي اختلاطاتو سره مخ دي، د دوی تر ملاتړ لاندې د هلمند په بوست ولایتي روغتونو بستر شوي، هغه شمېره چې د ۲۰۲۲ کال د همدې مودې په پرتله دوه برابره ده.
دغه راز په همدې موده کې په کندهار کې د بې پولې ډاکترانو د درملنې په مرکزونو کې څه باندې ۵۷۰ په خوارځواکۍ اخته ماشومان درملنه شوي او څه باندې ۳۰۰ نور ناروغان، نورو روغتیايي مرکزونو ته لېږدول شوي دي.
بې پولې ډاکترانو د ۲۰۲۵ کال له پیل راهیسې په نړیوالو مرستو کې د پام وړ کمښت د وضعیت د لا خبرابېدو یو له اصلي عواملو پېژندلی دی.
د روغتیا نړیوال سازمان د شمېرو له مخې، د بودیجې د کمښت په ترڅ کې ۴۴۵ صحي مرکزونه له هغې جملې ۲۰۳ ګرځنده روغتیايي او د خوړو ټیمونو، په افغانستان کې خپل فعالیت درولی دی.
دې سازمان زیاته کړې، پرلپسې وچکالیو، د کرنیزو تولیداتو کمښت او د پاکستان سره د لارو بندېدو له امله، د ځانګړو معالجوي خوړو په وارداتو کې خنډونه هم د خوارځواکۍ بحران لا پسې ژور کړی دی.
بې پولې ډاکترانو له مالي مرسته کوونکو، روغتیايي بنسټونو او مسوولو چارواکو څخه غوښتي، چې ژر تر ژره د تغذیې پروګرامونو د تمویل له لارې، افغانستان ته د طبي خوارکي توکو او اړینو روغتیايي تجهیزاتو استول پیل کړي.
بې پولې ډاکتران دا مهال د افغانستان په اوو ولایتونو کې فعالیت لري او په هلمند، هرات او کندهار کې په خوارځواکۍ اخته ماشومانو ته څانګړي طبي خدمات وړاندې کوي.
د دې سازمان د شمېرو له مخې، په ۲۰۲۵ کال کې له ۹ زره زیات ماشومان، د دې سازمان تر ملاتړ لاندې، د خوارځواکۍ درملنې په مرکزونو کې منل شوي دي.
