د ښځو د حقونو یو شمېر فعالانو او د افغانستان د رنګین کمانۍ ټولنې غړو د ایرلنډ پارلمان مخې ته اعتراضي غونډه وکړه او په افغانستان کې یې د جنسیتي توپیر په رسمیت پېژندلو، د ماشومتوب ودونو د درېدو او له طالبانو سره د اروپايي ټولنې د نه تعامل کولو غوښتنه وکړه.
رخشانه: معترضینو د پنشنبې په ورځ (د چنګاښ ۳ مه) د آیرلنډ پارلمان مخې ته په یوه بیانیه کې اعلان وکړ، چې نړیواله ټولنه د طالبانو سره د اړیکو عادي کول او یا په رسمیت پېژندل نه باید په داسې حال کې تر سره کړي، چې د دې ډلې د واکمنۍ تر سیوري لاندې، ښځې، نجونې او لږکي له خپلو اساسي حقونو محروم دي.
په دې بیانیه کې راغلي، ایرلنډ دولت باید د اروپايي ټولنې، ملګرو ملتونو او نورو ټولو نړیوالو بنسټونو په چوکاټ کې، د طالبانو سره د اړیکو عادي کولو لپاره د هر ډول اقدام مخالفت وکړي.
معترضینو ویلي، له طالبانو سره هر ډول تعامل باید د بشري حقونو په ځانګړې توګه د ښځو او نجونو د حقونو په رعایت کولو پورې تړلي وي.
دوی په افغانستان کې د ماشومتوب ودونو د پای ورکولو غوښتنه وکړه.
طالبانو تېره میاشت یو قانون تصویب کړ، چې د بشري حقونو د بنسټونو په وینا، افغانستان کې یې د ماشومتوب ودونو ته رسمیت ورکړی دی.
همدارنګه د معترضینو په بیانیه کې له افغان ښځو او نجونو په ځانګړې توګه د بشري حقونو د فعالانو، خبریالانو، ښوونکو او زیانمنونکو ډلو، له هغې جملې د LGBTQ+ ټولې پر ملاتړ ټینګار وکړ.
په دې وروستیو ورځو کې د طالبانو په رسمیت پېژندنې په اړه اندېښنې وروسته، له هغه زیاتې شوې، چې ځینو اروپايي هېوادونو د دې ډلې استازي وروبلل.
طالب استازو په ۲۰۲۱ کال کې واک ته د دې ډلې له رسېدو وروسته، پرون سه شنبې د (چنګاښ ۲مه) په لومړي ځل بروکسل کې د اروپايي ټولنې له چارواکو سره ولیدل.
دا ناسته چې موخه یې له اروپايي هېوادونو د افغان کډوالو ستنول وو، د بشري حقونو د سازمانونو او د ښځو حقونو د فعالانو توند غبرګونونه له ځان سره درلودل.
د آیرلنډ پارلمان مخې ته د معترضینو په بیانیه کې ټینګار شوی، چې ښځو، نجونو او لږکیو د حقونو له تضمین پرته، له طالبانو سره هېڅ ډول اړیکې عادي کول د منلو نه دي او له «حساب او کتاب ورکولو پرته هېڅ تعامل» ممکن نه دی.
