د افغان کډوالو ښځینه کرکټ لوبډلې برېتانیا ته تر تاریخي سفر او له بادشاه درېیم چارلېز سره تر لیدنې وروسته، د برېتانیا وسله والو ځواکونو ښځینه کرکټ لوبډلې سره دوستانه لوبه وکړه.
رخشانه: د دې دواړو لوبډلو تر منځ لوبه نن (شنبې د چنګاښ ۶ مه) له ماسپښين وروسته په کمبرېج ښار کې پیل او د برېتانیا وسله والو ځواکونو ښځینه لوبډلې په بریا پای ته ورسېده.
دې دواړ ټیمونو تر خپل منځ یوه شل اوریزه دوستانه لوبه تر سره کړه.
ټاکل شوې د افغان کډوالو ښځینه کرکټ لوبډله څو ساعته وروسته، د کمبرېج پوهنتون له ښځینه لوبډلې سره یوه دوستانه لوبه تر سره کړي.
د دې لوبې د نندارچیانو تر منځ د بشري حقونو یو شمېر فعالانو له هغې جملې د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ، د بشري حقونو څارډلې د آسیا څانګې څېړونکې فرشته عباسي او د ښځو د حقونو فعالې فوزیه کوفي ګډون درلود.
فوزیه کوفي په خپله اېکس پاڼه لیکلي، چې د افغان کډوالو ښځینه کرکټ لوبډلې په کمبرېج ښار کې د برېتانیا د وسله والو ځواکونو له ښځینه کرکټ ټیم سره میدان ته ښکته شول.
کوفي لیکلي: «دا هغه لاس راوڼه ده، چې زموږ د لوبغاړو او هر هغه چا لپاره چې دا یې ممکنه کړې د خورا سخت کار او هڅو څخه لاس ته راغلې ده.»
د ښځو د حقونو دې فعالې زیاته کړې: «دا یوازې د کرکټ په اړه نه ده، بلکې د خنډونو ماتولو او تازه فرصتونو رامنځ ته کولو په اړه ده.»
د بشري حقونو څارډلې د آسیايي څانګې څېړونکې او د بشري حقونو فعالې فرشته عباسي په خپله اېکس پاڼه د یوه پوسټ په کولو سره لیکلي: «ویاړم چې د افغانستان د ښځینه کرکټ لوبډلې ملاتړ کوم.»
هغې لیکلي: «هغوی د هیلو د څراغ په شان عمل کوي او د هرې افغان نجلۍ لپاره، چې په هېواد کې د ننه په دې لوبو کې د ګډون حق نه لري، لوبه کوي.»
د افغانستان د کرکټ ښځینه لوبډله په ۲۰۲۱ اګست کې د طالبانو له بیا واک ته رسېدو وروسته په استرالیا کې پانه اخیستې وه، خپله لومړنۍ لوبه یې د دې هېواد په ملبورن ښار کې د ۲۰۲۵ په جنورۍ کې ترسره کړه.
د کرکټ نړیوالې شورا د تېر میلادي کال په اپرېل کې د افغان کډوالو د ښځینه لوبغاړو د ملاتړ لپاره یوه ځانګړې کاري ډله رامنځ ته کړه.
دې شورا د انګلستان، استرالیا او هند د کرکټ پلاوي په مرسته، د دې لوبغاړو لپاره د مالي ملاتړ صندوق جوړ کړ.
په جلا وطنۍ کې د افغانستان د کرکټ ښځینه ملي لوبډلې لوبغاړو، د کرکټ نړیوالې شورا (ICC) څخه د په رسمیت پېژندلو غوښتنه وکړه.
هغوی د کرکټ نړیوالې شورا څخه غوښتي، چې د فوټبال نړیوال فدراسیون (فیفا) څخه پیروي وکړي او دوی د یوه ملي رسمي لوبډلې په توګه په رسمیت وپېژني.
