د افغانستان د رسنیو د ملاتړ سازمان (AMSO) وايي، طالبانو کابل ښار کې د عاشورا مراسمو د راپور چمتو کولو پر مهال یوه ښځینه خبریاله د څو ساعتونو لپاره نیولې ده.
رخشانه: امسو د یوې اعلامیې په خپرولو سره ویلي، طالبانو د پنشبې په ورځ د «چنګاښ ۴ مه) کابل ښار کې د عاشورا مراسمو سره هم مهاله، دا ښځینه خبریاله او د هغې همکار انخور اخیستونکی ونیول.
په اعلامیه کې راغلي، دا ښځینه خبریاله له څو ساعته نیولو او پوښتنو وروسته، د رسنۍ د مسوولینو او کورنۍ د غړو په منځګړیتوب خوشې شوې ده.
دې بنسټ په افغانستان کې پر خبریالانو او رسنیزو کارکوونکو د محدودیتونو زیاتوالي په اړه اندېښنه ښودلې وايي، طالبان د شیعه ګانو د مذهبي مراسمو د خبري پوښښ څخه مخنیوی کوي.
په ورته وخت، د افغانستان د شیعه ګانو د علماوو شورا هم اعلان کړی، چې طالبانو په دې وروستیو ورځو کې د عاشورا په مناسبت د شیعه ګانو د مذهبي مراسمو جوړولو محدودیتونه لګولي او د ځینو جوماتونو او تکیه خانو مسوولین یې «د ماتم» سمبولونو د پورته کولو په تور نیولي دي.
دې سازمان د ترلاسه شویو معلوماتو پر بنسټ ویلي، دا ښځینه خبریاله د «یوه نامحرم انځور اخیستونکي» د شتون په پلمه له ګواښوونکي چلند سره مخ شوې ده
امسو د امنیتي اندېښنو له امله، د دې خبریالې د هویت له څرګندونو ډډه کړې، خو له طالبانو یې غوښتي، چې د خبریالانو په ځانګړې توګه د ښځینه خبریالانو جسمي او رواني امنیت تضمین کړي.
طالبانو د دې ښځینه خبریالې د نیولو په اړه څه نه دي ویلي.
د افغان خبریالانو مرکز (AFJC) هم د مطبوعاتو آزادۍ د نړیوالې ورځې په مناسبت ویلي وو، د ۲۰۲۵ میلادي کال د می میاشتې څخه تر اوسه، په افغانستان کې د رسنیو ځپل او سانسور، په ډېره اندېښمنونکې توګه پراخ شوی دی.
دې مرکز ویلي وو، په تېرو دولسو میاشتو کې د طالبانو له لوري د رسنیو او خبریالانو د آزادۍ څخه د سرغړونې لږ تر لږه ۱۵۰ پېښې ثبت شوې، چې ۱۲۷ مورده یې ګواښل او ۳۰ مورده یې د خبریالانو نیول دي.
طالبانو له تېرو دوه ورځو راهیسې، کابل کې د تمدن تلوېزیون دفتر تړلی او خپرونې یې درولې دي.
