ننګرهار کې ځايی سرچینې وايي، د دې ولایت «ګوشته» ولسوالۍ کې یو پلار او لور کونړ سیند کې ډوب او ژوند یې له لاسه ورکړی.
رخشانه: د ننګرهار ګوشتې ولسوالۍ کې لږ تر لږه دوه سرچینو رخشانې رسنۍ ته ویلي، دا پېښه پرون سهار جمعه (د چنګاښ ۵ مه) رامنځ ته شوې ده.
د سرچینې په وینا، یو سړی د لامبو پر مهال له خپلې ۱۰ کلنې لور سره، په کونړ سیند کې ډوب شوی او ژوند یې له لاسه ورکړی دی.
ځايي سرچینو زیاته کړې، د سړي جسد موندل شوی خو د ماشومې نجلۍ جسد لا هم ورک دی.
د سرچینو په وینا، د دې ماشومې نجلۍ د جسد موندلو هڅې دوام لري.
ننګرهار ولایت کې ځايي طالب چارواکو تر اوسه په دې اړه څه نه دي ویلي.
هېواد کې هر کال د اوبو کچې په لوړېدو او د هوا په ګرمېدو سره، ورته پېښې په یو شمېر ولایتونو کې رامنځ ته کېږي او له خلکو قرباني اخلي.
