د بلخ ولایت مرکز مزارشریف ښار کې ځايي سرچینې وايي، د دې ښار په اتمه ناحیه کې د یوې ځوانې جوړې سرونه پرې کړای شوي دي.
رخشانه: لږ تر لږه درې سرچینو د دې پېښې د پخلي تر څنګ رخشانې رسنۍ ته ویلي، چې دا پېښه د یکشنبې په شپه د (چنګاښ ۷ مه) د «کارته نور خدا» په سیمه کې رامنځ ته شوې ده.
د سرچینو په وینا، دې ځوانې جوړې شاوخوا درې میاشتې وړاندې واده سره کړی وو.
سرچینو زیاته کړې، دا ځوانه جوړه، د ښځې د پخواني مېړه له خوا وژل شوي دي.
د سرچینو د خبرو له مخې، د دې ښځې پخوانی مېړه د شپې له خوا د دې ځوانې جوړې کور ته ورننوتلی او هغوی دواړه یې د چاقو په واسطه وژلي او سرونه یې ترې پرې کړي دي.
د دې ځوانې جوړې د هویت او عمر په اړه څه نه دي ویل شوي.
دا سړی په ایران کې له یو څه مودې کار کولو وروسته، بېرته هېواد ته راستون شوی او واده یې کړی وو.
معلومه نه ده، چې قاتل سړی نیول شوی دی که نه.
بلخ ولایت کې ځايي طالب چارواکو تر اوسه د دې پېښې په اړه څه نه دي ویلي.
د طالبانو له واکمنېدو وروسته، په هېواد کې ناموسي وژنې او جنايي پېښې په بې مخینې توګه زیاتې شوې دي.
