افغانستان کې د ملګرو ملتونو سیاسي استازولۍ دفتر وايي، په پکتیا، پکتیکا او کونړ ولایتونو د پاکستان د تېرې یکشنبې شپې په هوايي بریدونو کې لږ تر لږه ۲۸ تنه وژل شوي او د ښځو او ماشومانو په ګډون ۴۹ نور ټپیان شوي دي.
رخشانه: یوناما نن (دوشنبې د چنګاښ ۷ مه) له ماسپښین وروسته، په خپله اېکس پاڼه لیکلي، دا شمېرې لومړنۍ دي او د زیاتېدو امکان یې شته دی.
د ملګرو ملتونو د سیاسي استازولۍ دفتر لیکلي، پاکستاني ځواکونو د یکشنبې په شپه ۱۱:۳۶ بجې د پکتیا ولایت په څمکني ولسوالۍ برید کړی، چې په پایله کې یې ۲۲ تنه وژل شوي او ۴۷ نور ټپیان شوي دي.
یوناما لیکلي، پاکستاني ځواکونو په ورته وخت د پکتکیا ولایت په ګیان ولسوالۍ هم هوايي برید کړی، چې په ترڅ کې يې شپږ تنه وژل شوي دي.
د یوناما د خبرو له مخې، دوه تنه ماشومان د کونړ ولایت په مروره ولسوالۍ کې د پاکستان په هوايي بریدونو کې ټپي شوي دي.
یوناما پر ملکي افغان وګړو د پاکستان هوايي بریدونه په کلکه غندلي او نړیوالو قوانینو ته یې د درناوي غوښتنه کړې ده.
دې بریدونو سخت غبرګونونه راپارولي دي. د افغانستان د برېتانیا ځانګړي استازي ریچارد لیندسي، په خپله اېکس پاڼه لیکلي «په افغانستان او پاکستان کې دوامداره تاوتریخوالی او مرګ ژوبله غموونکې ده.»
هغه د «ترهګرۍ ټول ډولونه» غندلي او نړیوالو او د بشري حقونو قوانینو ته یې د درناوي او ملکي وګړو د خوندیتوب غوښتنه کړې ده.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ هم په خپله اېکس پاڼه، پر افغان خاوره د پاکستان هوايي بریدونه په کلکه غندلي دي.
نوموړي د دې پېښو د قربانیانو له کورنیو سره خواخوږي ښودلې او د ملکي وګړو د خوندیتوب او ساتنې او د [هغوی په وړاندې] د حساب ورکولو غوښتنه یې کړې ده.
د ملګرو ملتونو د ماشومانو ملاتړي صندوق هم په خپله اېکس پاڼه د یوه پوسټ په کولو سره پر افغان خاوره د پاکستان د یکشنبې د شپې هوايي بریدونو په اړه اندېښنه ښودلې ده.
دې بنسټ لیکلي، دواړه لوري باید «د نړیوالو او بشري حقونو د قوانینو پر اساس په خپلو ژمنو عمل وکړي او له ماشومانو باید تل ساتنه وشي.
