لغمان کې سیمه ییز طالب چارواکي وايي، د راستنېدونکو کډوالو یو «ټېلر» موټر د دې ولایت سرخکان ولسوالۍ کې سیند ته لوېدلی، چې له امله یې اووه تنه مړه شوي، اته تنه ټپیان او اووه نور ورک دي.
رخشانه: لغمان کې د طالبانو د امنیه قوماندانۍ ویاند یونس یوسفزي ویلي، دا پېښه د جمعې په ورځ (د چنګاښ ۱۲ مه) د کابل- جلال آباد پر لویه لار د سرخکان ولسوالۍ اړوند «خیروخېل» سیمه کې رامنځ ته شوې ده.
د یوسفزي په وینا، دې موټر له پاکستان نه راستنېدونکي کډوال هېواد ته رالېږدول، چې د موټر چلوونکي د بې احتیاطۍ له امله سیند ته لوېدلی دی.
نوموړي زیاته کړې، چې سیند ته د دې موټر د لوېدو پېښه کې د دوه ماشومانو او یوې ښخې په ګډون اوو تنو ژوند بایللی، اته تنه ټپیان شوي او اووه تنه نور لا هم ورک دي.
طالب ویاند ویلي، د اوو تنو قربانیانو او اتو تنو ټپیانو جسدونه له اوبو را ایستل شوي او د اوو تنو «ورکو» کسانو د موندلو هڅې روانې دي.
طالبانو د سیند غاړې خلکو غوښتي چې د ورکو شویو قربانیانو د جسدونو موندلو کې د دې ډلې له ځواکونو او ژغورنې ډلې سره همکاري وکړي.
د دې خونړۍ ترافیکي پېښې د قربانیانو او ورکو شویو کسانو د هویت او د ټپیانو د وضعیت په اړه څه نه دي ویل شوي.
ننګرهار کې یوې سرچینې د نوم نه ښودلو په شرط ویلي، دې موټر له پاکستان نه د کوچیانو کورنۍ افغانستان ته رالېږدوله.
شاوخوا څلور ورځې وړاندې هم د دې ولایت قرغه يي ولسوالۍ کې د کډوالو یو موټر سیند ته لوېدلی وو، چې له امله یې د لسو ماشومانو، پنځو ښځو او درې نارینه وو په ګډون ۱۸ تنه وژل شوي او ۲۹ نور ټپیان شوي وو.
په هېواد کې ډېری ترافیکي پېښې د خرابو او غیر معیاري سړکونو، له حده زیات ګړندي تګ، د ترافیکي قوانینو نه رعایت کولو او موټرو د زړښت له امله رامنځ ته کېږي.
په هېواد کې هر کال د ښځو او ماشومانو په ګډون لسګونه تنه، د ترافیکي پېښو قرباني کېږي.
