د َ«عدالت او برابرۍ لپاره د ښځو غږ» اعتراضي غورځنګ غړو بادغیس کې د طالبانو له لوري د صدیقې بندي کولو غبرګون کې وايي، له اجباري واده سره د مخالفت له امله زنداني کېدل، افغانستان کې له بشري حقونو سرغړونه او د ښځو ځپل ښيي.
رخشانه: د دې اعتراضي غورځنګ غړو په یوه اعلامیه کې له اجباري واده سره د مخالفت له امله، د طالبانو له لوري د صدیقې زنداني کول غندلي او دا اقدام یې د بشري حقونو څخه ښکاره سرغړونه وبلله.
د دې اعتراضي غورځنګ په اعلامیه کې راغلي، «د صدیقې دوسیه په افغانستان کې د هغو زرګونو ښځو د ترخه ژوند واقعیتونه څرګندوي، چې د تاوتریخوالي، جبر، تبعیض او له لومړنیو انساني حقونو څخه د محرومیت تر سیوري لاندې ژوند کوي.»
معترضو ښځو ویلي: «هغه نجلۍ چې د ملاتړ او عدالت ته د لاسرسي پر ځای، اړ کېږي د جبري واده او زندان تر منځ یو وټاکي، د عدالت پاشل کېدو، ظالمې واکمنۍ او انساني کرامت د جدي سرغړونې ښکاره بېلګه ده.»
دوی لیکلي: «جبري واده، د ښځو د ټاکلو حق اخیستل، د قربانیانو زنداني کول او د ښځو د غږ غلي کولو لپاره له قدرت څخه ګټه اخیستل، د بشري حقونو د بنسټیزه حقونو او ټولو انساني او نړیوالو اصوو سره په ټکر کې دي.»
د «عدالت او برابرۍ لپاره د ښځو غږ» اعتراضي غورځنګ غړو ویلي، هېڅ نجلۍ نباید له خپلې آزادۍ، ټاکلو د حق او انساني کرامت څخه دفاع په پار مجازات یا زنداني شي.
دوی «دوی په بېړنۍ او له قید او شرط پرته د صدیقې د خوشي کولو، جبري ودونو ته د پای ټکي اېښودولو، خپل سرو نیونو، د نجونو او ښځو ځپلو ته پای ورکولو او په افغانستان کې د دوی پر وړاندې د هر ډول تاوتریخوالي او تبیعض درولو» غوښتنه کړې ده.
معترضو ښځو له ملګرو ملتونو، ریچارد بنټ، د بشري حقونو بنسټونو، دولتونو او د ښځو د حقونو مدافع سازمانونو څخه غوښتي، چې د دې «بې عدالتۍ» په وړاندې غلي پاتې نه شي او د صدیقې د خوشي کولو او له افغان ښځو او نجونو د ملاتړ لپاره عملي ګامونه پورته کړي.
طالبانو د بادغیس ولایت بالامرغاب ولسوالۍ کې ۱۷ کلنه بې بي صدیقه له یوه قومي مخور او دې ډلې ته نېږدې کس سره د جبري واده د مخالفت له امله، په پنځه کاله بند محکومه کړې ده.
