د «ښځو د حرکت شبکې» اعتراضي غورځنګ د کانکور پایلو د اعلان په غبرګون کې، چې د څلورم پرلپسې کال لپاره له نجونو پرته تر سره شو، ویلي، له نجونو پرته کانکور ازموینه د جنسیتي توپیر او د افغان ښځو د سستماتیک محرومیت رسمي سند دی.
رخشانه: د دې اعتراضي غورځنګ غړو نن (سه شنبې د چنګاښ ۱۶ مه) د یوې اعلامیې په خپرولو سره، د نجونو له شتون پرته د کانکور ازموینه غندلې او ویلي یې دي «له نجونو پرته کانکور، د عدالت، انسانیت او نړیوال وجدان د سقوط سندی دي.»
د «ښځو د حرکت شبکې» اعتراضي غورځنګ په اعلامیه کې راغلي «د نجونو له شتون پرته د کانکور د پایلو اعلان، د بریا ورځ نه بلکې، د عدالت، برابرۍ او افغانستان د راتلونکې د خښېدو ورځ ده.»
د دې اعتراضي غورځنګ غړو په هېواد کې د میلیونونه نجونو په زده کړو د طالبانو محدودیتونو ته په اشارې لیکلي «دا محدودیت یوازې د طالبانو جنایت نه دی، بلکې د نړیوالې ټولنې د کلونو چوپتیا، بې عملۍ او ناکاره سیاستونو پایله هم ده.»
معترضو ښځو ویلي، طالبانو په افغانستان کې د ښځو او نجونو په اساسي حقونو او آزادیو د محدودیتونو په لګولو سره، د جنسیتي توپیر او د افغان نجونو د راتلونکې د لمنځه وړلو مرتکب شوي دي.
هغوی ویلي، د افغان ښځو د وضعیت په اړه د نړیوالې ټولنې او بشري حقونو د بنسټونو چوپتیا او نه فعالیت «طالبان لا بې ادبه کړي او د ښځو له منځه وړل یې په یوه عادي سیاست بدل کړی دی.»
معترضو ښځو له نړیوالې ټولنې غوښتي چې «د ژمنو د تکرار او اندېښنو څرګندولو پر ځای، د جنسیتي توپیر د پای ته رسولو لپاره اغېزمن او پرېکنده اقدام وکړي، طالبان د مسوول وګني او د افغان ښځو او نجونو ریښتینی ملاتړ د وکړي.»
د ازموینو ملي کمېټې چې د طالبانو تر واک لاندې فعالیت کوي، تېره ورځ د ۱۴۰۵ کال د ټول هېواد د کانکور پایلې، د څلورم پرلپسې کال لپاره د نجونو له شتون پرته اعلان کړې.
دې ډلې یوازې په ۱۴۰۱ کال کې نجونو ته د کانکور په عمومي ازموینه کې د ګډون اجازه ورکړه، خو د دې ازموینې د پایلو له اعلان سره سم یې هغوی ته، پوهنتون ته د تګ اجازه ور نه کړه. د ۱۴۰۵ کال کانکور د څلورم پرلپسې کال لپاره د نجونو له شتون پرته تر سره شوی وو.
