د بشري حقونو څار سازمان ویلي، اروپايي ټولنه دې، د افغان کډوالو د ستنولو لپاره نه، بلکې د بشري حقونو د رعایت په پار له دې ډلې سره تعامل وکړي.
رخشانه: دې سازمان نن (چهارشنبې د چنګاښ ۱۷ مه) د یوې اعلامیې په خپرولو سره، اروپايي ټولنې ته د طالب چارواکو د پلاوي سفر ته غبرګون ښودلی دی.
د بشري حقونو څار ډلې ویلي، اروپايي ټولنه په افغانستان کې د ۲۰۲۱ کار د جون په ۲۲ مه د طالبانو تر بیا واکمنېدو وروسته، د لومړي ځل لپاره بروکسل کې د طالب چارواکو د یوه پلاوي کوربه وه.
دې بنسټ لیکلي، اروپايي کمېسیون دا لیدنه «تخنیکي» او د افغان کډوالو د بېرته ستنولو پر موضوع متمرکزه بیان کړې، په داسې حال کې، چې طالبان هغه «یو تاریخي سفر» او د اروپايي ټولنې له غړو هېوادونو سره د کونسلي چارو د عادي کولو لپاره بولي.
د دې بنسټ په وینا، دا خبرې اترې سره له دې، چې اروپايي ټولنه د طالبانو د بشري حقونو د خورا خراب ریکاډ څخه خبره وه او په مکرر ډول یې پرې نیوکې کړې تر سره شوې دي.
د بشري حقونو د څار ډلې د افغانستان د برخې څېړونکې فرشته عباسي ویلي، د نړیوالو قوانینو له مخې، دولتونه نه باید یو څوک داسې یوه هېواد ته بېرته ستون کړي، چې هلته له ریښتیني خطر، ځورولو، تعقیب، ربړوې او نورو ټولو غیرانساني چلندونو یا ځاني ګواښ سره مخ وي.
هغې ویلي، افغانستان د هېڅ اجباري ستنېدونکي لپاره خوندي هېواد نه دی. طالبان هغه کسان چې په جبري توګه افغانستان ته ستنول شوي، نیولي او شکنجه کړي یې دي. دې ډلې د رسنیو خپلواکي سخته محدوده کړې او د بشري حقونو منتقدان او مدافعان یې په خپل سرې توګه نیولي دي.
عباسي زیاته کړې، طالبانو نجونې او ښځې له زده کړې او تحصیل محرومې کړې، د ښځو پر کار، ټولنیز حضور او ګرځېدو یې پراخ محدودیتونه لګولي دي.
د مېرمن عباسي په وینا، د هغه کسانو ستونزې چې افغانستان ته ستنول کېږي، یوازې تر ځورولو او ناوړه چلند پورې نه محدودېږي. هغوی تر ډېره په کمو امکاناتو، له سرپناه پرته او د ډېرو کمو لومړنیو خدماتو سره هېواد ته داخلېږي.
هغې ټینګار کړي، ډېری هغه کسان چې افغانستان ته ستنول کېږي، په داسې یوه هېواد کې، چې له اقتصادي پاشلتیا، د بهرنیو مرستو کمېدو، بېکارۍ، وچکالۍ او پراخو ځپونو سره مخ دی، د ژوندي پاتې کېدو لپاره له ګڼو ستونزو سره لاس او ګرېوان دي.
د بشري حقونو د څار ډلې د افغانستان د برخې څېړونکې ویلي: «د طالبانو له خوا د بشري حقونو د سرغړونو د غندلو او له همدې ډلې سره د خلکو د ستنولو په برخه کې، چې د دوی ژوند او آزادي له خطر سره مخ وي، ښکاره تضاد دی.»
فرشتې عباسي زیاته کړې، که اروپايي ټولنه او د هغې غړې هېوادونه غواړي، د افغانستان په تړاو یې سیاست، معتبر او د باور وړ وي، باید افغانستان ته جبري ستنول ودروي.
هغې ویلي، اروپايي ټولنه دې له طالبانو سره تعامل د بشري حقونو د رعایت کولو لپاره د فشار په توګه وکاروي، نه دا چې د خلکو جبري ایستل داسې ځمکې ته عادي، کړي، چېرې چې دوی له ځورونې او د هغوی د حقونو له سرغړونو سره مخ شي.
