د روغتیا نړیوال سازمان سیمه ییز مسوول حنان بلخي، چې په څو ورځني سفر افغانستان ته راغلی وايي، په دغه هېواد کې ۱۵۰ روغتیايي مرکزونه د بودجې د کمښت له امله تړل شوي دي.
رخشانه: بلخي نن (چهارشنبې د چنګاښ ۱۷ مه) په خپله اېکس پاڼه د یوه پوسټ په کولو سره، د طالبانو تر واک لاندې افغانستان کې د روغتیايي خدماتو رسولو لپاره د بودجې د کمښت خبرداری ورکړی دی.
هغه لیکلي، د بودجې کمښت په دې مانا دیو چې روغیتايي کارکوونکي د ماشومانو د واکسین کولو لپاره لږ توانايي لري، میندو په سخته توانېږي، خوندي پاملرنې ته لاسرسی پیدا کړي او ناروغان هم د اساسي روغتیايي خدماتو د ترلاسه کولو په برخه کې له ستونزو سره مخ دي.
د روغتیا نړیوال سازمان سیمه ییز مسوول د دې وضعیت له دوام څخه خبرداری ورکړی او لیکلي یې دي «دا زیانونه له پامه نه شو غورځولی.»
هغه همدارنګه لیکلي، په افغانستان کې له ۲۲ میلیونه زیات وګړي بشري مرستو ته اړتیا لري، چې له دې ډلې ۱۴.۴ میلیونه کسان روغتیايي خدماتو ته اړتیا لري.
حنان بلخي زیاته کړې، چې افغانستان ته یې د خپل څلور ورځني سفر په ترڅ کې کندهار ولایت ته تللی او د میرویس روغتون څخه یې لیدنه کړې ده. هغه ویلي د بودجې د کمښت او نورو ستونزو سره سره، د دې مرکز روغتیايي کارکوونکي هره ورځ خلکو ته ژغورونکي خدمات وړاندې کوي.
بلخي ټینګار کړی، د ۲۰۲۶ کال لپاره د «روغتیا وږي» ځواب ویونکی پروګرام، لا هم د بودجې د سخت کمښت سره مخ دي او د ۲۰۲۶ کال د جون تر میاشتې پورې یوازې ۱۷ سلنه د اړتیا وړ بودجه، چې د ۱۹۰.۸ میلیون ډالرو سره برابره ده، چمتو شوې ده.
نوموړي د روغتیايي خدماتو د ساتلو، د لاسته راوړنو د ساتنې او هغو کسانو ته د روغتیا خدماتو رسولو لپاره د ړیوالې ټولنې دوامداره پانګونه «حیاتي» بللې، چې خورا اړمن دي.
د روغتیا نړیوال سازمان سیمه ییز مسوول ویلي، په خپلو لیدونو کې یې موندلې، چې د افغانستان روغتیايي نظام په راتلونکې کې به هم د نړیوالې ټولنې په دوامداره ملاتړ پورې تړلی وي.
حنان بلخي همدارنګه ویلي، په افغانستان کې د صحي بشري ژوندانه د فعالیتونو یوه لویه برخه، د نړیالو مرستندویانو په دوامداره مالي مرستو پورې اړه لري.
هغه ټينګار کړیو چې د افغانستان په روغتیايي نظام کې پانګونه نه یوازې نن د انسانانو ژوند ژغوري، بلکې د دې نظام تاب راوړل هم زیاتوي، پر ناروغانو پاملرنه پیاوړې کوي او دا تضمینوي، چې میلیونونه خلک لا هم اساسي روغتیايي خدماتو ته لاسرسی ولري.
