له پولیو پاک افغانستان پاڼې اعلان کړی، چې کونړ او د نورستان ولایت په پنځو ولسوالیو کې د ماشومانو د پولیو یا ګذڼ واکسین کمپاین پیل شوی دی.
رخشانه: دا کمپاین نن (شنبې د چنګاښ ۲۰ مه) په ټول کونړ او د نورستان ولایت په «کامدېش، برګمټال، وایګل، وام او پارون» ولسوالیو کې پیل شوی دی.
له پولیو پاک افغانستان پاڼې د دې دوه ولایتونو له خلکو غوښتي، چې خپل له پنځو کلونو کم عمره ماشوام واکسین کړي.
دې پاڼې لیکلي، په دې لړۍ کې د پولیو واکسین سربېره، د ماشومانو د معافیت سیستم د پیاوړتیا او د ویروس د خپرېدو د مخنیوي لپاره به د جزوي ستنې او څاڅکي واکسین هم ورکړل شي.
معلومه نه ده، چې د واکسین په دې لړۍ کې به، په کونړ او نورستان کې څومره له پنخو کلونو کم عمره ماشومان واکسین شي.
له پولیو پاک افغانستان پاڼې زیاته کړې، هر ماشوم حق لري، چې روغه او روښانه راتلونکې ولري. د پولیو واکسین پلي کول د ماشومانو د خوندیتوب لپاره یو مهم او ګټور ګام دی.
دا په داسې حال کې ده، چې د تېرې اوونۍ د سه شنبې په ورځ، په کندهار ښار او د هلمند په پنځو ولسوالیو کې هم د پولیو واکسین پلي کېدو لړۍ پیل شوې وه.
د روغتیا نړیوال سازمان څه موده مخکې روان میلادي کال په هېواد کې د پولیو ویروس د دوه مثبتو پېښو خبر ورکړی وو.
د دې سازمان د راپور له مخې، د دې دوه مثبتو پېښو په ثبتېدو سره، په ۲۰۲۶ کال کې د پولیو ټولې پېښې شپږ مورده ته رسېدلې دي.
افغانستان او پاکستان په نړۍ کې دوه هغه هېوادونه دي، چې تر اوسه د پولیو یا ماشومانو د ګذن ویروس په لمنځه وړلو نه دي بریالي شوي.
