د بشري حقونو د څار سازمان وايي، افغانستان کې میلیونونه وګړي د مخ پر زیاتېدونکې پراخې لوږې سره مخ دي او دا کړکېچ په ناوړه توګه ښځې او نجونې تر اغېز لاندې راولي.
رخشانه: د افغانستان د برخې لپاره د دې بنسټ څېړونکې فشته عباسي پرون (جمعه د چنګاښ ۲۶ مه) د یوې اعلامیې په خپرولو سره د طالبانو تر واک لاندې افغانستان کې د سختې لوږې په اړه خبرداری ورکړی دی.
عباسي لیکلي، روان میلادي کال په افغانستان کې له ۱۷ میلیونه زیات وګړي له خوړو له سخت کمښت سره مخ کېدونکي دي او دې کړکېچ په ناوړه توګه ښځې او نجونې تر اغېزې لاندې راولي.
د عباسي په وینا، د بهرنیو مرستو سخت کمښت، شته خراب وضعیت نور هم بد کړی دی او مرسته کوونکي بنسټونه ناچاره شوي، چې خپل پروګرامونه راکم کړي، خدمات محدود کړي او مرستې یوازې تر اړمنو کسانو پورې ځانګړې کړي.
د بشري حقونو څار سازمان کې د افغانستان د برخې څېړونکې ویلي، افغانستان کې کابو ۲۲ میلیونه کسان د خوړو بېړنۍ مرستې او د درملنې خدماتو ته اړتیا لري.
هغې له ایران او پاکستان څخه د پنځه میلیونه زیاتو افغان کډوالو راستنېدو ته په اشارې وايي، د دې کډوالو راګرځېدو هم پر زیان مننونکو ټولنو ډېر فشار وارد کړی دی.
فرشتې عباسي په مرسته رسوونکو نړیوالو سازمانونو او ملګرو ملتونو کې د ښځینه کارکوونکو پر فعالیت د طالبانو محدودیتونو ته هم اشاره کړې وايي، دې محدودیتونو اړمنو کسانو ته د مرسته کوونکو بنسټونو لاسرسی پېچلی کړی دی.
افغانستان کې مرسته کوونکو بنسټونو خبرداری ورکړی، چې که چېرې بېړنۍ او زیاته بودجه برابره نه کړای شي، نو په دې هېواد کې به میلیونونه کسان حیاتي مرستې له لاسه ورکړي.
فرشتې عباسي له طالبانو غوښتي، چې د ښځو د حقونو ټول ماتونکي محدودیتونه، له هغې جملې د ښځو د ګرځېدو او کار په وړاندې محدودیتونه لغوه کړي او هغه اقدامات چې بشر دوستانه مرستو ته د ښځو لاسرسی محدودوي، پای ته ورسوي.
