د هرات جبرییل ښارګوټي کې ځايي سرچینو ویلي، د طالبانو امربالمعروف ځواکونو د دې ښارګوټي د «چهارده متره بالا» سیمه کې یوه ځوانه نجلۍ د «حجاب نه مراعت کولو» په تور نیولې او له ځان سره یې وړې ده.
رخشانه: د هرات جبرییل ښارګوټي کې دوو سرچینو ویلي، دا ځوانه نجلۍ، نن (سه شنبې د چنګاښ ۳۰ مه) له غرمې مخکې ۱۰:۵۰ بجې په «چهارده متره بالا» سیمه کې د ښځو لپاره د ځانګړي شوي یوه مارکېټ څخه نیولې ده.
د سرچینو په وینا، دا ځوانه نجلۍ شاوخوا ۱۷ کلنه ده او په دې مارکېټ کې یې د ښځو لپاره ځانګړي شوي «سینګارتوکي» پلورل.
د سرچینو په حوله، د طالبانو د امربالمعروف اووه تنه ځواکونه ناڅاپي دې مارکېټ ته د ننه شول، تر څو د ښځو حجاب و ارزوي.
سرچینو زیاته کړې، دې ځوانۍ نجلۍ د «هوا د ګرموالي او دوکان د تشوالي په دلیل چادرنماز» له سره لرې کړی وو او په همدې خاطر د طالبانو د امربالمعروف ځواکونو له خوا ونیول شوه.
د رخشانې رسنۍ سرچینو ویلي، د طالبانو د امربالمعروف ځواکونو د دې اونۍ په اوږدو کې، په هرو دوه ورځو کې یو ځل د ښځو د حجاب ارزولو په موخه، په جبريیل ښارګوټي کې د ښځو لپاره ځانګړي شوي مارکېټ ته سر ورښکاره کوي.
د طالبانو د امربالمعروف ځواکونو له خوا، د هرات ښار ښار له بېلو بېلو سیمو د حجاب نه مراعت کولو په تور د ښځو او نجونو نیول له شاوخوا څلوېشت ورځو راپدېخوا دوام لري.
د طالبانو د امربالمعروف ځواکونو په هرات کې د حجاب نه مراعت کولو په تور، د ښځو او نجونو د نیولو نوې څپه د روان لمریز کال د غبرګولي له ۱۶ مې نېتې پیل کړې او دا لړۍ لا هم دوام لري.
دې ځواکونو په تېرو څو اوونیو کې لسګونه ښځې او نجونې، د دې ښار له بېلا بېلو سیمو څخه نیولې او زنداني کړې دي. د راپورونو له مخې، نیول شوې ښځې او نجونې، د طالبانو په زندانونو کې د دې ډلې د ځواکونو له خوا د جنسي ځورونې سره مخ شوې دي.
هرات کې د ښځو او نجونو نیول کېدو د بشري حقونو د بنسټونو او خلکو پراخ غبرګونونه له ځان سره درلودل.
د هرات د جبرییل ښارګوټي اوسېدونکو، دې نیونو ته په غبرګون کې اعتراضي غوندې وکړې، چې د طالبانو د ځواکونو له خوا په هدفي توګه وځپل شوې.
