نورستان کې ځايي طالب چارواکي وايي، د دې ولایت مرکز پارون ښار کې د تېرې ورځې په سېلابونو کې، د یوې ښځې او یوه ماشوم په ګډون ۲۳ تنو ژوند له لاسه ورکړی، له ۸۰ تنو زیات ټپیان شوي او له ۱۰۰ زیات کسان ورک دي.
رخشانه: نورستان کې د طالبانو د والي ویاند فریدون صمیم نن (سه شنبې د چنګاښ ۳۰ مه) ویلي، د پلټنې او کسانو د ژغورنې عملیات لا هم دوام لري.
هغه زیاته کړې، تېره ورځ د خونړیو سېلابونو راوتلو له امله، په مرکز پارون ښار کې لسګونه کورونه، دوکانونه، هوټلونه او د دې ښار شاوخوا سیمې په قسمي او بشپړه توګه له منځه تللې دي.
د صمیم په وینا، لسګونه جرېبه کرنیزه ځمکه هم ویجاړه شوې او ځايي اوسېدونکو ته شاوخوا ۳۵ میلیونه ډالر زیان هم اوښتی دی.
نورستان کې د طالبانو د والي ویاند وايي، د دې سېلابونو د زیان او قربانیانو د وروستیو شمېرو په اړه به معلومات، د ژغورونکو عملیاتو تر پای ته رسېدو وروسته اعلان شي.
طالبانو له ملي سوداګرو، نړیوالو مرستندویه بنسټونو او خیریه موسسو غوښتي، تر څو له زیانمنو شویو کورنیو سره په بېړنۍ توګه مرسته وکړي.
افغانستان کې په ملګرو ملتونو پورې تړلو بنسټونو، په نورستان کې د تېرې ورځې د سېلاب ځپلو کورنیو سره خواخوږي ښودلې او له هغوی سره یې د مرستې او همکارۍ اعلان کړی دی.
افغانستان کې د ملګرو ملتونو د ماشومانو ملاتړي صندوق (یونیسف) په خپله اېکس پاڼه د یوه پوسټ په خپرولو سره، په نورستان کې د بېړنیو روغتیايي خدماتو وړاندې کولو لپاره د یوه ګرځنده کلېنیک د جوړولو خبر ورکړی دی.
