ننګرهار کې ځايي طالب چارواکو ویلي، د دې ولایت مرکز جلال آباد ښار کې د یوه کور د چت لوېدو پېښه کې، د څلورو ماشومانو په ګډون د یوې کورنۍ پنځو غړو ژوند بایللی او دوه تنه نور ټپیان شوي دي.
رخشانه: د ننګرهار د اطلاعاتو او کلتور ریاست د اطلاعاتو امر قریشي بدلون ویلي، دا پېښه د پنشنبې (زمري اولې) په ماښام، د جلال آباد ښار د اوومې ناحیې اړوند د «افغان مینې» په سیمه کې رامنځ ته شوې ده.
بدلون ویلي، د دې کورنۍ چت د وروستیو باراونو له امله لوېدلی، چې په ترڅ کې یې د ښځو او ماشومانو په ګډون د یوې کورنۍ پنځو غړو ژوند بایللی او دوه تنه نور ټپیان شوي دي.
هغه زیاته کړې، په دې پېښه کې درې هلکان، یوه نجلۍ او د دې کورنۍ پلار ژوند له لاسه ورکړی، مور او یو زوی ټپیان شوي دي.
د پېښې ټپیان د درملنې په موخه روغتون ته لېږدول شوي دي. د هغوی د روغتیايي حالت په اړه څه نه دي ویل شوي.
د تېرې اوونۍ له وروستیو راهیسې د هېواد په یو شمېر ولایتونو کې سخت بارانونه شوي او مرګوني سېلابونه راغلي دي.
د تېرې اوونۍ د دوشنبې په ورځ د نورستان ولایت مرکز پاروان ښار کې د سختو سېلابونو راوتلو له امله، ۲۳ تنه مړه شوي، ۱۲۵ تنه ټپیان او یو شمېر نور ورک شوي دي. له دې پېښې د شپږو ورځو په تېرېدو سره لا هم د ورکو شویو کسانو جسدونه نه دي موندل شوي.
