یو شمېر افغان ښځینه فعالانو، د بشري حقونو له ۳۰ سازمانونو سره په همکارۍ، د ملګرو ملتونو عمومي منشي آنتونیو ګوترش ته، په یوه ګډه لیک کې د دې سازمان له لوري په افغانستان کې د پراخ بنسټ حکومت جوړلو د زمینې برابرولو غوښتنه کړې ده.
روخشانه: دا لیک په دې وروستیو کې د «افغانستان لپاره ښځې (WFA) موسسې له ادارس څخه، په داسې حال کې لیکل شوی، چې په افغانستان کې د ملګرو ملتونو د سیاسي دفتر (یوناما) نوې مشره معرفي شوه.
په دې لیک کې راغلي، یوناما باید په افغانستان کې د ننه او بهر د افغان ښځو د بېلا بېلو ډلو، دیموکرتیکو ځواکونو، مدني ټولنې له استازو او سیاسي اړخونو سره د دوامداره تعامل لپاره یوه منظمه او هدفمنده تګلاره رامنځ ته کړي.
د دې لیک لیکوالانو لیکلي دي، دا ډول تعامل باید له سلا مشورو ور پورته وي او دا تضمین کړي، چې افغان ښځې او ټول سیاسي او ټولنیز جریانونه د سیاسي پروسې په جوړلو کې مانا لرونکی او ریښتینی رول لري.
په دې لیک کې د امنیت شورا د ۲۷۲۱ پرېکړه لیک د «خپلواکۍ ارزونې» د سپارښتنو په بشپړه پلي کېدو، د افغانستان لپاره د ملګرو ملتونو د ځانګړي استازي پر ټاکلو او د خبرو اترو او سیاسي بهیر په ټولو پړاوونو کې د ښځو د معنوي ونډې پر تضمین ټينګار شوی دی.
ښځو او د بشري حقونو فعالانو د «یوناما» په بې پرېتوب ټینګار کړی وايي، دا بنسټ باید «د ښځو ګوښه شویو غږونو ته غوږ شي، تر څو افغان وګړي د خپلې راتلونکې په اړه د پرېکړې کولو څخه بې برخې نه شي.»
دی د ملګرو ملتونو له امنیت شورا غوښتي چې «په افغانستان کې د سولې د تحقق لپاره د خپلواکې ارزونې په بشپړ ملاتړ او د یوې معتبرې سیاسي لارې پرمخ وړلو سره نوی مشرتابه وښيي.»
د دې پرانیستي لیک لیکوالانو د افغانستان او سیمې لپاره د هر اړخیزو خبرو اترو، سیاسي مشروعیت او تلپاتې سولې پر مرکزي دریځ ټینګار کړی دی.
