بادغیس کې ځايي سرچینې ادعا کوي، چې د دې ولایت د بالامرغاب ولسوالۍ د اوسېدونکې او طالبانو سره د بندي ۱۷ کلنې بي بي صدیقې له دوسیې د یوې میاشتې په تېرېدو، لا هم دغې ډلې د هغې د دوسیې د ارزونې او عدالت د تامینولو لپاره هېڅ اقدام نه دی تر سره کړی.
رخشانه: بادغیس ولایت کې د صدیقې یو له خپلوانو نن (دوشنبې د زمري ۵ مه) د هویت پټ ساتلو سره رخشانې رسنۍ ته ویلي، د دې ولایت بالامرغاب ولسوالۍ کې ځايي طالبان، دې دوسیې ته په رسیدګۍ کې «بې پروايي» کوي.
سرچینې ویلي، د بادغیس بالامرغاب ولسوالۍ کې د طالبانو ولسوال، دې دوسیې «د سویل لوېدیځ زون د ابتدایه او مرافعه محکومو پرېکړو» ته پاملرنه نه کوي، د «تمیز محکمې پرېکړه» یې شرعي بللې او همدارنګه صدیقه یې زانداني کړې ده.
د سرچینې په وینا، د بادغیس بالامرغاب ولسوالۍ کې د طالبانو استخباراتي ځواکونو، د ترکمن قوم مشران او د بي بي صدیقې خپلوان ګواښلي او د موریچاق کلي ځوانان یې نیولي دي.
سرچینې زیاته کړې، د بي بي صدیقې مدافع وکیل «د دوسیې تر روښانه کېدو پورې د هغې مشروطه آزادي» غوښتې وه، خو بالامرغاب کې ځايي طالبانو دا غوښتنه رد کړې او ویلي یې دي، کېدای شي صدیقه له هېواده تېښته وکړي.
په هغه اسنادو کې چې رخشانې رسنۍ ته په واک کې ورکړل شوي هم لیدل کېږي، چې د بالامرغاب لپاره د طالبانو ځايي محکمې، له دې غوښتنې سره موافقت ونه کړ او لیکلي یې دی، چې د بي بي صدیقې دوسیه «تر بیا کتنې لاندې ده او له هېواده د تېښتې په خاطر یې، په ضمانت نه خوشي کوي.»
د سرچینې د ادعا له مخې، وروسته له هغې، چې د بالامرغاب ولسوالۍ لپاره د طالبانو د ځايي محکمې د رییس له خوا د بي بي صدیقې د مدافع وکیل د هغې د مشروطه خوشي کولو غوښتنه رد شوه، ولسوال د بي بي صدیقي وکیل ته و ویل: «د دې قضیې د [دایمي] حل لپاره صدیقه درې ورځې خدای نظر ته وسپاره، تر څو هغه له تاسو سره سوله وکړي.
د دې ځوانۍ نجلۍ خپلوانو له طالبانو غوښتي، چې له هغې سره «د یوه انسان او مسلمان په څېر چلند وکړي، او نه باید ترکمن والی ګناه وي.»
کابو میاشت وړاندې بادغیس کې سرچینو ویلي وو، چې طالبانو د دې ولایت بالامرغاب ولسوالۍ کې یوه ۱۷ کلنه نجلۍ، له دې ډلې سره د نږدې قومي مشر سره د واده نه منلو له امله، په پنځه کاله بند محکومه کړې ده.
د سرچینې په وینا، دا نجلۍ پنځه کاله وړاندې د خدای نظر په نوم د یوه سړي له خوا، د خپل پلار چې په نشه يي توکو روږدی دی، د مالي پور له امله، «د ضمانت او په زور د پور د ورکړې» په توګه د هغه کور ته ور وستل شوې وه، چې څه موده هلته تر څار لاندې وه او وروسته زنداني شوې ده.
