د «آزادۍ پر لور د ښځو غورځنګ» غړو په هېواد د طالبانو د پنځمې کلیزې په درشل کې وايي، دغې ډلې له بشري حقونو په سرغړونو او د خلکو د اساسي خپلواکیو تر پښو لاندې کولو سره، هېواد په زندان بدل کړی دی.
رخشانه: د دې اعتراضي غورځنګ غړو نن (دوشنبې د زمري ۱۲ مه) په اسلام آباد او کابل کې جلا جلا اعتراضي غونډو جوړې او پرېکړه لیکونه یې صادر کړل.
د «آزادۍ پر لور د ښځو غورځنګ» په پرېکړه لیک کې راغلي، په هېواد د طالبانو په پنځه کلنه واکمنۍ، د هېواد د وګړو، په ځانګړې توګه د ښځو، نجونو او ځوانانو لاسته راوړنې له منځه وړل شوې دي.
د دې اعتراضي غورځنګ غړو ویلي، طالبانو د بشري حقونو په سیستماتیک سرغړاوي، د خلکو د اساسي خپلواکیو په ځپلو، له عمومي ځایونو د ښځو په حذفولو او د ښځو په وړاندې د تبعیض په پلي کولو سره یو نامشروع حکومت رامنځ ته کړی دی.
دوی ټینګار کړی، چې هېڅ ځواک د هېواد د معترضو ښځو د غږ غلي کولو توان نه لري او د افغان ښځو غږ «نن د نړۍ د بیدار وجدان په غږ بدل شوی دی.»
د آزدۍ پر لور د ښځو غورځنګ غړو، د طالبانو حکومت د ولسي مشروعیت نه لرلو، د بشري حقونو پراخ سرغړاوي او د ښځو په وړاندې د تبعیضي سیاست له امله غندلی دی.
دوی غوښتنه کړې، چې د ښځو په وړاندې د طالبانو سیاستونه د جنسیتي تبعیض په توګه په رسمیت وپېژندل شي او د دې جرمونو عاملین باید په نړیوالو فورمونو کې په قانوني توګه مسوول وګڼل شي.
معترضو ښځو له ملګرو ملتونو، دولتونو، نړیوالو بنسټونو او نړیوالې ټولنې غوښتي، چې د افغانستان د وضعیت په اړه غلي پاتې نه شي او له طالبانو سره د افغانستان د خلکو د اساسي حقونو له تضمین پرته د اړیکو له هر ډول عادي کولو څخه د ډډه وکړي.
هغوی په هېواد کې د ښځو او نجونو د اساسي حقونو په رعایت کولو ټینګار کړی، او پر ښځو او نجونو یې د طالبانو د ټولو تپل شویو محدودیتونو د فوري لغوه کولو غوښتنه کړې ده.
د «آزادۍ پر لور د ښځو غورځنګ» غړو ویلي، د هېواد راتلونکې د ټولو وګړو په برابر ګډون، بشري حقونو ته په درناوي، عدالت، ولسواکۍ او د قانون په حاکمیت سره تر لاسه کېدای شي.
