د ملګرو ملتونو د خوړو نړیوال پروګرام (WFP) د طالبانو تر واک لاندې افغانستان کې، د ماشومانو د خوارځواکۍ د لا بحراني کېدو په اړه خبرداری ورکړی وايي، د ماشومانو خوارځواکي په ۱۲ ولایتونو کې بحراني کچې ته رسېدلې ده.
رخشانه: دې بنسټ نن (سه شنبې د زمري ۱۳ مه) په یوه اعلامیه کې لیکلي، په افغانستان کې د ماشومانو د خوارځواکۍ بحران د بشري مرستو په کمېدو سره لا ژوره شوې او د ماشومانو ژوند یې له ګواښ سره مخ کړی دی.
په اعلامیه کې راوړل شوي، د بودیجې کمېدو دا بنسټ اړ کړی، چې د خوړو او تغذیې ژغورونکي پروګرامونه، چې د بل هر وخت په پرتله ورته اړتیا ډېره ده راکم کړي.
دې بنسټ خبرداری ورکړی، چې د بېړنۍ مرستې پرته به د خوړو نړیوال پروګرام او ملګري یې ونه شي کولی، د هغو ماشومانو د شمېر د زیاتوالي مخه ونیسي، چې په سختې خوارځواکۍ اخته کېږي او دا وضعیت به په راتلونکو میاشتو کې د نورو ژوند هم له خطر سره مخ کړي.
د خوړو نړیوال پروګرام ویلي، خوارځواکي، په هلمند، دایکندي، زابل، بغلان، اروزګان، پکتیکا، نورستان، سرپل، غور، کندهار، فاریاب او لوګر ولایتونو کې «بحراني» کچې ته رسېدلې او اټکل کېږي، چې تر اکتوبر میاشتې پورې به نوره هم زیاته شي.
د دې بنسټ له اعلامیې له مخې، د ماشومانو حاده خوارځواکي په خطرناکه کچه کې ده، چې د ژوند ژغورونکو درملنې ته بېړنۍ اړتیا په ګوته کوي.
د ملګرو ملتونو د خوړو نړیوال پروګرام وايي، سږ کال په افغانستان کې ډېری ماشومان کافي خواړه نه لري، ان په داسې حال کې، چې خواړه معمولآ ډېر وي.
د ماشومانو د خوړو نه خوندیتوب د کال په لومړۍ دریو میاشتو کې د نفوس ۴۷ سلنې ته رسېدلې ده.
د سازمان په وینا، په افغان ماشومانو کې خوارځواکي په ندرت سره یوازې پېښېږي او د ماشومانو د مړینې خطر د پام وړ زیاتوي.
په افغانستان کې د خوړو نړیوال پروګرام مدیر جان آیلیف ویلي: «موږ د راتلونکي نسل د کمښت شاهدان یو، په داسې حال کې چې د حاصلاتو وخت دی، هغه وخت چې باید د پرېمانۍ فصل وي، دا وضعیت یوازې ځوروونکی نه دی، بلکې د منلو وړ هم نه دی»
هغه زیاته کړې، چې په ۲۰۲۵ میلادي کال کې، په ټول افغانستان کې ۱۴۲ روغتیايي مرکزونه تړل شوي او له ۱۳ زره زیات ماشومان، د بشري مرستو د کمښت له امله، د خوارځواکۍ د درملنې له پروګرامونو محروم شوي دي.
د هغه په وینا، سږ کال په افغانستان کې په خوارځواکۍ اخته، کابو یو میلیون میندې او ماشومان د پنځو میاشتو لپاره د تغذیې له اړینو خدماتو محروم پاتې شول.
د اټکلونو له مخې، په افغانستان کې کابو ۳.۷ میلیونه ماشومان په حاده خوارځواکۍ اخته کېدونکي دي او ګمان کېږي، چې ۱.۲ میلیونه امیدواره او شیدې ورکوونکې ښځې به هم په خوارځواکۍ اخته شي.
د خوړو نړیوال پروګرام خبرداری ورکړی، چې که بېړنۍ پانګونه ونه شي، دا شمېرې به لا زیات شي.
جان آیلیف زیاته کړې ده: «افغانستان همدا اوس په نړۍ کې د خوارځواکۍ یو له خورا سخت او دوامداره بحران سره مخ دی او دا ټکان ورکوونکې شمېرې ښايي له دې هم زیاتې شي. دا بحران کېدای شي له ټولو پخوانیو وړاندوینو هم ډېر شي او ډېری میندې او ماشومان به د مخنیوي وړ مړینه باندې محکوم کړي.»
د خوړو نړیوال پروګرام ټینګار کړی، چې د خوارځواکۍ مخنیوی او درملنې خدماتو پراخول اړین دي، تر څو د بحران د لا پراخېدو مخه ونیول شي. دې بنسټ ویلي، د خوارځواکۍ د بحران د زیاتوالي د مخینوي لپاره، په راتلونکو شپږو میاشتو کې په بېړنۍ توګه ۵۴۰ میلیون ډالره بودیجې ته اړتیا لري.
