د پولنډ پولیسو ویلي، درې پېغلې نجونې، چې د افغانستان وګړې دي، څو ورځې وړاندې د دې هېواد پلازمېنه وارسا ښار کې لادرکه شوې دي.
رخشانه: دا درې ځوانې خویندې، د شنبې ورځ (د زمري ۱۰ مه) مازیګر کابو شپږ بجې خپل استوګنځای پريښی دی.
د وراسا د پنځمې ناحیې د پولیسو د اعلامیې له مخې، دا درې خویندې، د ۱۸ کلنه ثنا بدر، ۱۶ کلنه لمه بدر او ۱۴ کلنه مروه بدر دي.
د پولنډ پولیسو ویلي، دا درې ځوانې خویندې د وروستي ځل لپاره په ځايي وخت د شپې ۸:۵۰ د وراسا د تراموا د موټرو په تمځای کې لیدل شوې او له هغې مخکې یې له یوه پلورنځي توکي هم پېرلي وو.
د پولیسو په وینا، د دې نجونو د وروستي ځل لیدو څخه راهیسې تر اوسه د هغوی د شتون د ځای په اړه هېڅ معلومات په لاس کې نشته.
د پولیسو د راپور له مخې، دا درې خویندې نه کور ته ګرځېدلې او نه یې هم له کورنۍ سره اړیکه نیولې. هغوی تلېفونونه او هویتي اسناد هم له ځان سره نه درلودل.
پولیسو ویلي، چې د دې دریو ځوانو نجونو د موندلو لپاره د پلټنې عملیات دوام لري.
پولیسو له ښاریانو غوښتي، چې په دې اړه د هر ډول معلوماتو تر لاسه کولو سره، د دوی سره اړیکه ونیسي.
