د «افغانستان د ځواکمنو ښځو غورځنګ» غړو د اګست ۱۵ مه د طالبانو د پنځمې کلیزې په مناسب ویلي، د دې ډلې له واک ته رسېدو وروسته، د هېواد د میلیونونه وګړو ژوند بحران ته ننوتی دی.
رخشانه: د دې اعتراضي غورځنګ غړو نن (پنشنبې د زمري ۱۵ مه) په یوه اعلامیه کې لیکلي، طالبانو په ښځو د محدودیتونو په لګولو سره، هغوی له خپلو اساسي انساني حقونو محرومې کړې دي.
په اعلامیه کې راغلي، د جمهوریت نظام په نسکورېدو سره، د میلیونونه افغان وګړو په ځانګړې توګه د ښځو او نجونو ژوند د محرومیت او محدودیت د بحران تازه پړاو ته ننوتی دی.
معترضو ښځو ویلي، د طالبانو په پنځه کلنه واکمنۍ، چې افغان ښځې او نجونې لا هم د دې ډلې د سیستماتیک حذف او تبعیض په وړاندې ولاړې دي.
د دوی په وینا، د طالبانو پالیسیو ښځې او نجونې له زده کړې، کار، ټولنیز او سیاسي ګدون او ډېر اساسي انساني حقونو بې برخې کړې دي.
معترضو ښځو ویلي، له ټولنې د ښځو حذفول، نه یوازې له بشري حقونو ښکاره سرغړونه ده، بلکې د هېواد د سولې، ثبات او دوامداره پراختیا په وړاندې هم لوی خنډ دی.
د افغانستان د ځواکمنو ښځو د غورځنګ غړې په دوام وايي، د افغان ښځو حقونه د معاملې او د انساني کرامت د ځنډلو وړ نه دي.
دوی له نړیوالې ټولنې، ملګرو ملتونو او دولتونو غوښتي، چې د افغان ښځو د د حقونو د سیستماتیک سرغړاوي په وړاندې چوپ پاتې نه شي.
همدارنګه معترضو ښځو له نړیوالې تولنې او ملګرو ملتونو غوښتي، چې د افغانستان د خلکو له حقونو او اساسي خپلواکیو د ریښتیني ملاتړ لپاره عملي ګامونه پورته کړي.
دوی ټینګار کړی، چې د افغانستان د راتلونکې په اړه هر ډول سیاسي بهیر، د ښځو او مدني ټولنې له واقعي او مانا لرونکي شتون پرته، د یوې باثباته او عادلانه سولې لامل کېدای نه شي.
