د «افغان ښځو د آزادۍ لارې غورځنګ» غړو د اګست پنځلسمه، پر هېواد د طالبانو د پنځمې کلیزې په درشل کې، یو ځل بیا له نړیوالې ټولنې وغوښتل، چې د طالبانو تر واک لاندې افغانستان کې د ښځو وضعیت ته پاملرنه وکړي.
رخشانه: د دې اعتراضي غورځنګ غړو نن (شنبې د زمري ۱۷ مه) په یوه اعلامیه کې لیکلي، چې طالبانو په تېرو پنځو کلونو کې د محدودیتونو په لګولو سره، ښځې او نجونې له خپلو اساسي حقونو او آزادیو بې برخې کړې دي.
د «افغان ښځو د آزادۍ لارې غورځنګ» په اعلامیه کې، له بشري حقونو په دفاع، په ځانګړې توګه د افغان ښځو او نجونو د آزادۍ، برابرۍ او انساني کرامت په حقونو ټيڼګار کړی دی.
د دې اعتراضي غورځنګ غړو له نړیوالې ټولنې غوښتي، چې د افغانستان خلک، په ځانګړې توګه ښځې او نجونې هېرې نه کړي.
دوی له نړیوالې ټولنې دا غوښتنه هم کړې، چې د افغان ښځو د حقونو او خپلواکیو لپاره عملي ګامونه پورته کړي.
د «افغان ښځو د آزادۍ لارې غورځنګ» ټینګار کړی، چې آزادي، عدالت او برابري د افغانستان د خلکو مسلم حق دی.
د ښځو اعتراضي غورځنګونو په تېرو پنځو کلونو کې په وار وار، پر ښځو او نجونو د طالبانو پر محدودیتونو نیوکې کړې او له نړیوالې ټولنې یې د افغان ښځو او نجونو وضعیت ته د پاملرنې غوښتنه کړې ده.
په هېواد د طالبانو د واک د پنځم کال په نېږدې کېدو سره، دغه ډلې نه یوازې پر ښځو او نجونو خپلو محدودیتونو ته پای نه دی ورکړی، بلکې دا محدودیتونه یې د وخت په تېرېدو لا سخت کړي دي.
