د «روزنه امید سازمان» غړو د اګست پنځلسمې، پر هېواد د طالبانو د واکمنۍ د پنځمې کلیزې په درشل کې، د ښځو په وړاندې د طالبانو د محدودیتونو په نیوکې سره ویلي، هېڅ ټولنه د ښځو له شتون پرته د روښانه راتلونکې په لور نه شي تلای.
رخشانه: د دې اعتراضي غورځنګ غړو نن (سه شنبې د زمري ۲۰ مه) د پاکستان کویټه ښار کې راټول او د اعتراضي پروګرام په تر سره کولو سره یې په هېواد کې د طالبانو پر محدودیتونو او سیاستونو سختې نیوکې وکړې.
د «روزنه امید سازمان» په اعلامیه کې راغلي، هېواد کې د جمهوریت نظام په نسکورېدو سره، د میلیونونه هېوادوالو لپاره د بحران، محدودیت او ګډوالۍ یو نوی څپرکی پیل شو.
اعلامیې راوړي: «د اګست د ۱۵ مې یادونه، د راتلونکې په اړه د فکر کولو لپاره یو فرصت دی، چې په هغې کې د ټولو افغان وګړو لپاره انساني کرامت، آزادي، عدالت، زده کړې، کار او امنیت تضمین وي.»
د دې غونډې ګډونوالو د لوحو په نیولو او د اعتراضي شعارونو په ورکولو سره، د هېوادوالو د اساسي حقونو د خوندیتوب، د ښځو او نجونو د زده کړې او کار حق، آزادۍ، عدالت، امنیت او د افغانستان د نوي نسل د روښانه راتلونکې غوښتنه کوله.
د «روزنه امید سازمان» غړو ویلي، د افغانستان خلک نه غواړي، چې د کډوالۍ او بې برخلیک توب درد راتلونکو نسلونو ته په میراث بدل شي.
دوی د یوې داسې راتلونکې غوښتنه وکړه، چې په هغې کې هېڅ فرد «اړ نه شي، چې د امنیت او آزادۍ د تر لاسه کولو لپاره خپل هېواد پرېږدي.»
د اعتراضي غونډې ګډنوالو د سمبولیک زندان د میلو تر شا د افغان ښځو او نجونو د وضعیت په اړه اعتراضي او ټکان ورکوونکی انځور نندارې ته وړاندې کړ.
دوی د اعتراضي لوحوپه نیولو سره، د زندان د میلو تر شا ودرېدل، تر څو وښي، چې پراخو محدودیتونو څه ډول له افغان ښځو او نجونو د ژوند، زده کړې، کار او ټولنیز حضور فرصتونه اخیستي دي.
معترضو مېرمنو د ښځو او نجونو په وړاندې د محدودیتونو د لغوه کولو، د نجونو پر مخ د ښوونځیو او پوهنتونونو د دروازو پرانستلو، د ښځو لپاره د کار او ټولنیز فعالیت د زمینې برابرولو او د هغوی حقونو او انساني کرامت ته د درناوي غوښتنه وکړه.
