د «افغان ښځو د سیاسي ګډون شبکې» غړو د اګست پنځلسمه، د واک ته د طالبانو د پنځمې کلیزې په درشل کې، دې ډلې ته په خطاب کې ویلي، آزادي د تل لپاره نه شي تړل کېدای.
رخشانه: د دې اعتراضي غورځنګ غړو نن (چهارشنبې د زمري ۲۱ مه) په یوه بیانیه کې لیکلي، طالبانو په تېرو پنځو کلونو کې د آزادیو په حذفولو، سازمان شویو ځپنو، له بشري حقونو په سرغړونو او له انساني حقونو د ښځو په محرومولو سره حکومت کړی دی.
د «افغان ښځو د سیاسي ګډون شبکې» په بیانیه کې راغلي، پر هېواد د طالبانو په پنځه کلنه واکمنۍ کې میلیونونه انسانان د انتخابو زده کړې، کار، بیان آزادۍ او د خپل راتلونکي ټاکلو په اړه د ګډون له حق څخه محروم شوي دي.
معترضو ښځو لیکلي، طالبانو په دې کلونو کې هڅه کړې، چې په ځپلو، وېرولو او آزادۍ غوښتونکو غږونو په غلي کولو سره، د افغانستان د خلکو هوډ مات کړي.
دوی ویلي دي، طالبانو په دې موده کې ښځې له عمومي ژوند څخه حذف کړې، مدني فعالان او خبریالان تر فشار لاندې راوستی، مذهبي او قومي لږکي له تبعیض او تاوتریخوالي سره مخ کړي او د مخالفت هر ډول غږ ته په نیولو او ځپلو ځواب ورکړی دی.
د «افغان ښځو د سیاسي ګډون شبکې» غړو د طالبانو او د دې ډلې د مخالفینو تر منځ نښتو زیاتوالي ته په اشارې وايي، هېڅ حکومت نه شي کولی د تل لپاره د وېرې او محرومیت پر بنسټ حکومت وکړي.
د معترضو ښځو په باور، د خپلواکۍ لپاره د افغانستان د خلکو مبارزه، یوه مشروع او د ملت د ارادې څخه راپورته شوې مبارزه ده.
دوی له نړیوالې ټولنې، ملګرو ملتونو او د بشري حقونو له مدافع بنسټونو غوښتي، چې د افغاستان د خلکو د کړاو په وړاندې چوپتیا غوره نه کړي او د طالبانو ځپوونکي سیاسیتونه عادي نه کړي.
