د «ښځو همت، عدالت غوښتونکو ښځو، د آزادۍ لمر، د برابرۍ لپاره افغان ښځې او ښځو د آزادۍ شبکې» اعتراضي غورځنګونو ویلي، نړیواله ټولنه باید د ښځو په وړاندې د دې ډلې محدودیتونه د جنسیتي توپیر په توګه وګڼي.
رخشانه: د دې اعتراضي غورځنګونو غړو نن (پنشنبې د زمري ۲۲ مه) پر هېواد د طالبانو د واکمنۍ د پنځمې کلیزې په مناسبت یوه ګډه اعلامیه صادره کړه.
د دې اعتراضي غورځنګونو په اعلامیه کې راغلي «د اګست پنځلسمه د افغان ښځو لپاره د هغې دورې پیل دی، چې په کې میلیونونه ښځې او نجونې له خپلو اساسي انساني حقونو محرومې شوې دي.»
اعلامیه کې ویل شوي، د طالبانو واک ته له رسېدو وروسته، د نجونو پر مخ د ښوونځیو او پوهنتونو دروازې وتړل شوې، ښځې له کاره بې برخې کړای شوې، د هغوی اعتراضونه وځپل شول او معترضې ښځې له نیولو، ربړولو، ګواښونو او تاوتریخوالي سره مخ شوې.
معترضو ښځو ویلي، هغه څه چې پر افغان ښځو تحمیل شوي، یوازې د محدویدتونو یوه ټولګه نه، بلکې له ټولنې او عمومي ژوند څخه د ښځو د سیستماتیک لرې کولو یو سیاست دی، چې باید د نړیوالې ټولنې له خوا د جنسیتي توپير په توګه وګڼل شي.
دوی زیاته کړې، افغان ښځو د دې محدودیتونو په وړاندې سکوت نه دی کړی، هغوی له ګواښونو، نیولو، ربړولو سره سره، په واټونو او مدني فضا کې درېدلې او په خپله خوله یې د خپلو حقونو غوښتنه کړې.
معترضو ښځو له نړیوالې ټولنې، ملګرو ملتونو او دولتونو غوښتي، چې له تکراري محکومولو وړاندې تېرشي او په افغانستان کې د جنسیتي توپير او د ښځو د حقونو د سیستماتیکو سرغړونو د پای ته رسولو لپاره عملي او بېړني ګامونه پورته کړي.
دوی د طالبانو له لوري د معترضو ښځو نیولو، ربړلو او ځپلو ته په اشارې غوښتنه کړې، چې دا ډله باید د بشري حقونو د سرغړونو په تړاو ځواب و وايي او د قربانیانو لپاره عدالت رامنځ ته کړي.
معترضو ښځو ټینګار کړی، چې د افغانستان د راتلونکې په اړه هېڅ غونډه باید د ښځو او نجونو له مانا لرونکي ګډون پرته تر سره نه شي.
