هېواد کې د طالبانو بیا واک ته رسېدو د پنځمې کلیزې سره سم، د ملګرو ملتونو ۵۶ هېوادونو د یوې ګډې اعلامیې په خپرولو سره، له افغان ښځو په ملاتړ او د هغوی په وړاندې د طالبانو د محدودیتونو په لغوه کولو ټينګار وکړ.
رخشانه: د دې هېوادونو په ګډه بیانیه کې راغلي، د طالبانو تر ولکې لاندې افغانستان لا هم د بشري حقونو، اقتصادي او امنیتي ژورو ستونزو سره مخ دي.
دې هېوادونو د طالبانو له لوري د ښځو او نجونو هدفي ځپلو ته په اشارې ویلي، افغانستان لا هم په نړۍ کې یوازینۍ هېواد دی، چې نجونې په کې له منځنیو او لوړو زده کړو بې برخې دي.
بیانیه کې راوړل شوي، افغانستان کې د طالبانو له لوري د نجونو د زده کړې حق څخه جدي سرغړونې د اقتصادي پراختیا او د لومړنیو عامه خدمتونو د وړاندې کولو په برخه کې پراخې پایلې لري.
د دې بیانیې صادرونکو هېوادونو ویلي، د ورځ تر بلې زیاتېدونکو تبعیضي فرمانونو له لارې، چې تبعیض لا بنسټیز کوي او له ښځو قانوني ملاتړ کمزوری کوي او همدارنګه د ښځو او نجونو حقونه، کرامت او اختیار ترې اخلي.
د بلاق شنوونکو شبکه: تېرو پنځو کلونو کې ۴۹۷ هزاره ګان د طالبانو او وسله والو کسانو له خوا وژل شوي
یوناما: پر ښځو د طالبانو محدودیتونه د بیارغونې او نړیواله ټولنه کې د افغانستان د منلو په وړاندې خنډ دی
دې هېوادونو زیاته کړې، په افغانستان کې بشري اړتیاوې لا هم ډېري دي، له بشري حقونو سرغړونې دوام لري او ترهګرې ډلې لا هم د دې هېواد وګړي او د سیمې او نړۍ امنیت ګواښي.
دغو هېوادونو ټینګار کړی، چې د افغانستان خاوره باید د هېڅ هېواد پر وړاندې د ګواښ او برید، د ترهګریزو کړونو د پلان او تمویل او د ترهګرو د پټنځایونو او روزنې لپاره ونه کارول شي.
د بیانیې صادرونکو هېوادونو له طالبانو غوښتي، چې د ښځو او نجونو په وړاندې خپل له تبعیض څخه ډګ محدودیتونه لغوه کړي او دغه راز په ملګرو ملتونو کې د ښځینه کارکوونکو د کار بندیز هم پای ته ورسوي.
یادو هېوادونو په ټولو برخو کې د افغان ښځو د بشپړ، برابر، مانا لرونکي او خوندي ګډون غوښتنه کړې او له طالبانو یې غوښتي، چې بشري حقونو او د خلکو اساسي خپلواکیو ته درناوی وکړي.
