د «بلاق شنوونکو شبکې» په نوم څېړونکي بنسټ په یوه راپور کې ویلي، پر افغانستان د طالبانو په پنځه کلنه واکمنۍ کې هزاره وګړي له مطلق فردي، ټولنیز او سیاسي امنیت له محرومیت سره مخ وو او په دې موده کې ۴۹۷ هزاره ګان د طالبانو او وسله والو کسانو له خوا وژل شوي او ۳۶۳ نور ټپیان شوي دي.
رخشانه: دې بنسټ د «د طالبانو په پنځه کلنه واکمنۍ کې د هزاره ګانو د بشري حقونو وضعیت» تر عنوان لاندې راپور کې ویلي، د طالبانو په تېره پنځه کلنه واکمنۍ کې په هزاره ګانو ۳۶ خونړي ترهګر بریدونه او ۴۷ ځلې د طالبانو او وسله والو کسانو تر نېغ ترور لاندې راغلي دي.
د «بلاق شنوونکو شبکې» په راپور کې راغلي، هزاره ښځې او نجونې د «قومي او جنسیتي تبیعض» له امله د ځپلو او خپل سرو نیونو تر ټولو سختو ډولو سره مخ دي.
راپور راوړي، طالبانو په تېرو پنځو کلونو کې، «په جاغوري، ګیزاب، پاتو او د کابل په امید سبز ښارګوټي کې» د هزاره ګانو اړوند ۱۹۸۴۰ جرېبه ځمکه غصب یا «ممنوع التصرف» اعلان کړې ده.
قومي پاکونه څه ده؟ (لومړۍ برخه)
معترضې ښځې: د طالبانو محدودیتونه باید د نړیوالې ټولنې له خوا جنسیتي توپیر وګڼل شي
د راپور له مخې، طالبانو په غور، بامیان، پروان او بغلان ولایتونو کې هم د هزاره ګانو اړوند سلګونه جرېبه کرنیزه ځمکه او څړ ځایونه مصادره کړي او لسګونه کورنۍ یې د وسلې په زور جبري کډه کړې دي.
دې بنسټ په خپل راپور کې « له ښوونیز نصاب څخه د جعفري فقهې لرې کول، له حنفي فقهې په زور د شیعه زده کوونکو پیروي، له تاوتریخوالي ډک محدودیتونو پلي کول او د محرم د ماتم په مراسم کې د لسګونو کسانو نیول» د تاریخي حافظې په منظم ډول ویجاړول بللي او دا یې د «کلتوري نسل وژنې» ښکاره بېلګه بللې ده.
د بلاق شنوونکو شبکې د جرمونو له نړیوالې محکمې او د ملګرو ملتونو له تحقیقاتي میکانېزمونو غوښتي، چې د هزاره ګانو پر وړاندې، د جبري کډه کولو، د ځمکو د غصب او هدفي وژنو په اړه، چې د «بشریت په وړاندې جرم» او «نسل وژنې» ښکاره بېلکې دي، د ترسره شویو جرمونو څېړنې وکړي.
دې بنسټ د ملګرو ملتونو د بشري حقونو شورا نه غوښتي چې «په افغانستان کې د حقوقي آپارتاید، د مذهبي خپلواکیو د سرغړونو او له لږکیو د مالکیت سلبولو د مستند کولو لپاره» یو خپلواک تحقیقاتي میکانېزم رامنځ ته کړي.
د بلاق شنوونکو شبکې له نړیوالې ټولنې غوښتي، چې له طالبانو سره خپل ديپلوماتیک تعامل او غیر بشري مرستې «د سیستماتیک تبعیض بندولو، د لږکیو حقونو تر پښو لاندې کولو قوانینونو له لغوه کولو او د هزاره وګړو د غصب شویو ځمکو د بېرته ورکولو» په شرط پورې وتړي.
