د ملګرو ملتونو د ښځو څانګې اجرايي مدیرې سیما باهوس پر افغانستان د طالبانو د واکمنۍ پنځمې کلیزې په مناسبت، د ښځو او نجونو په وړاندې د دې ډلې محدودیتونو ته په اشارې ویلي، له ټولنې د افغان ښځو ایستل نه باید عادي کړای شي.
رخشانه: باهوس نن (دوشنبې د زمري ۲۶ مه) په خپله اېکس پاڼه لیکلي دي، د افغان ښځو او نجونو حقونه د معاملې وړ نه دي.
نوموړې زیاته کړې، د طالبانو د واکمنۍ او له ټولنې د افغان ښځو او نجونو د ایستلو پنځه کاله تېرېږي او دا وضعیت هېڅ کله باید عادي نه کړای شي.
د ملګرو ملتونو د ښځو برخې اجرایه مدیرې ویلي، دا بنسټ د افغان ښځو او نجونو تر څنګ ولاړ دی او د هغوی له حقونو، کرامت او غږ څخه ملاتړ کوي.
د ملګرو ملتونو د ښځو څانګې څه موده وړاندې په یوه راپور کې لیکلي وو، طالبانو په افغانستان کې د سختو محدودیتونو په لګولو سره، د هېواد نیمايي وګړي په سیتماتیک ډول له منځه وړي دي.
دې بنسټ په خپل راپور کې راوړي دي، طالبانو تېرو پنځو کلونو کې په افغانستان کې، د ښځو او نجونو په وړاندې له ۱۰۰ زیات فرمانونه صادر کړي، چې تبعیض یې بنسټیز کړی او د هغوی اساسي حقونه یې ترې اخیستي دي.
د ملګرو ملتونو د راپور له مخې، افغانستان کې نیمايي ښځې او نجونې په تګ راتګ او عمومي فضا ته په لاسرسي، د سختو محدودیتونو له امله، په میاشت کې یو یا دوه ځله له کوره د باندې وځي.
