د کابل لوېدیځ دشت برچي کې روغتیايي سرچینو ومنله، چې د مهدیه ښارګوټي د «شمع دانش» خصوصي ښوونځي کې نن (دوشنبې زمري ۲۶ مه) مازیګر مهال، د شوې چاودنې ۱۷ ټپیان امام زمان روغتون ته لېږدول شوي دي.
رخشانه: په هغه نوملړ کې چې رخشانې رسنۍ تر لاسه کړی، په ۱۷ تپیانو کې ۴ هلکان او ۱۳ نجونې چې عمرونه یې له ۹ تر ۱۴ کلونو دي، دشت برچي کې امام زمان روغتون ته وړل شوي دي.
د سرچینو د معلوماتو له مخې، د ټپیان شمېر له دې زیات دی او طالبان د دې پېښې د کره مرګ ژوبلې د خپرولو مخیوی کوي.
یو بله سرچینه چې د پېښې شاهده وه، رخشانې رسنۍ ته یې ویلي، شاوخوا ۳۵ ټپیان روغتونو ته لېږدول شوي دي.
د سرچینې په وینا، دا چاودنه له ښوونځي د زده کوونکو د رخصتېدو پر مهال شوې او ښايي د مرګ ژوبلې کچه لوړه وي.
تر اوسه کره معلومات نشته، چې په دې چاودنه کې څومره زده کوونکي وژل شوي او ټپیان دي.
طلوع نیوز د یوې امنیتي سرچینې په حواله راپور ورکړی، چې په دې چاودنه کې ۵۲ ده کوونکي ټپیان شوي دي.
تر دې وړاندې دشت برچي کې سرچینو رخشانې رسنۍ ته ویلي وو، چاودنه نن مازیګر شاوخوا ۴:۳۰ بجې د اتلسمې حوزې اړوند مهدیه ښارګوټي د «شمع دانش» ښوونځي ته نېږدې رامنځ ته شوې ده.
