«د ښځو او ماشومانو د حقونو تحقیقاتي بنسټ» مشرې زرقا یفتلي، د خپلو هغو شپږو همکارانو د خوشي کېدو غوښتنه وکړه، چې شاوخوا یوه میاشت وړاندې د طالبانو استخباراتي ځواکونو کابل کې د دې بنسټ له دفتر څخه ونیول.
رخشانه: زرقا یفتلي نن (دوشنبې د زمري ۲۶ مه) په خپله فسبوک پاڼه لیکلي، «سلطان علي رحیمي، احمدصایم حزین، حامد احمد صدیقي، عبدالمتین حکیمي، عبدالقدیر حمیدي او بسم الله» شاوخوا یوه میاشت کېږي، چې د طالبانو په زندان کې دي.
هغې زیاته کړې، همکاران یې «له خپلو اساسي او قانوني حقونو، له هغې جملې مدافع وکیل او د تور پوهېدو ته له لاسرسي محروم پاتې دي.»
زرقا یفتلي د خپلو همکارانو په برخلیک اندېښنه څرګند کړې وايي، د هغوی کورنۍ به انتظار او اندېښنه کې دي.
د ښځو او ماشومانو د تحقیقاتي بنسټ مشرې د طالبانو له زندانه د خپلو همکارانو د ژر تر ژره خوشي کېدو غوښتنه کړې ده.
نوموړې له نړیوالې ټولنې، د بشري حقونو له بنسټونو او د افغانستان د بشري چارو لپاره د ملګرملتونو له ځانګړي راپور ورکوونکي غوښتي، چې د همکارانو د خوشي کېدو لپاره یې هڅې وکړي.
