د بدخشان ولایت نسي ولسوالۍ کې ځايي سرچینې وايي، طالب ځواکونو د جمعه خان فاتح تر نیولو وروسته، په هغه پورې تړلو کسانو د نیولو لپاره کور په کور پلټنې پیل کړې او د تلاشۍ پر مهال د سیمې د اوسېدونکو خصوصي حریم نه رعایت کوي.
رخشانه: د بدخشان نسي کې لږ تر لږه دریو سرچینو ویلي، د جمعه خان فاتح اړوند کسانو د نیولو لپاره کور به کور پلټنې له څو ورځو راهیسې دې ولسوالۍ کې پیل شوې دي.
سرچینو د دې وضعیت له دوام اندېښنه ښودلې زیاتوي د طالبانو «پښتون توکمه ځواکونه» د کور په کور تلاشۍ پر مهال د سیمې له اوسېدونکو سره ناوړه چلند کوي.
د سرچینو په وینا، کور په کور پلټنې د نسي ولسوالۍ په «قوغز، زغر، شاخ دوره او راداوج» کلیو کې د جمعه خان فاتح اړوند ځواکونو د وسلو او جنګي مهماتو د ضبط کولو په موخه تر سره کېږي.
یوې سرچینې د هویت پټ ساتلو سره رخشانې رسنۍ ته ویلي، د طالب ځواکونو له خوا د کورونو تلاشي «د خلکو مال او ځان ته یو ډول لاس غځول» دي.
د سرچینې په وینا، سره له دې چې جګړه پای ته رسېدلې، خو طالبان لا هم نسي ولسوالۍ ته ځواکونه لېږي او په سیمه کې د وسله والو ځواکونو شتون د دې لامل شوی، چې ځینې کورنۍ له کوره د باندې وېره ولري.
نسي ولسوالۍ کې یوې ښځې د رخشانې رسنۍ خبریال ته ویلي، په دې ولسوالۍ کې د جګړو له پای ته رسېدو سره سره لا هم ډېری ښځې د طالبانو له وېرې او د دې ډلې د ځواکونو د شتون له امله، روغتیايي خدماتو ته لاسرسی نه لري.
هغه ویلي: «په دې سیمو کې لا هم ښځې بشپړه او ډاډمنو روغتیايي خدماتو ته لاسرسی نه لري او د امنیتي وضعیت د وېرې له امله، ډېری امیدواره مېرمنې اړ شوې چې کور کې زېږون وکړي.»
سرچینې زیاته کړې، دوه ورځې وړاندې د جمعه خان فاتح ښځې هم د دې وضعیت په جریان کې په خپل کور او په نامناسبو روغتیايي شرایطو کې زېږون وکړ.
یوې بلې سرچینې ادعا کړې، د طالبانو یوه پښتون توکمه غړي د نسي ولسوالۍ د «شاخ دره» کلي کې یو ځوان هلک وژلی او جسد یې سیند ته غورځولی دی.
د سیمې اوسېدونکي ادعا کوي، چې نسي ولسوالۍ کې د طالبانو د یوې څرخکې د لوېدو له امله یو ۱۵ کلن ماشوم وژل شوی او درې نور ماشومان ټپیان شوي دي.
دا ادعاوې تر اوسه په خپلواکه توګه نه دي تایید شوې.
د بدخشان نسي ولسوالۍ کې له طالبانو د ناراضي او تاجک توکمه قوماندان جمعه خان فاتح اړوند ځواکونو او دې ډلې د طالب توکمه ځواکونو تر منځ نښتې له زمري له ۲۰ مې تر ۲۶ پورې دوام درلود، چې په پای کې څو ورځې وړاندې جمعه خان فاتح طالبانو ته تسلیم شو.
